بعد ماتبين لنا ما كان
صدقنا الوعد فى الزمان والمكان
وعملنا بدل الحلقه اربعه كمان
وعيان وما حدش قالى سلامتك يامان
والتراباتات تيت تاراباتات تان
خلصنا الدبلومه وبقينا فى مرحلة الامان
.
.
مرحلة التدريب العملي:
دي أصعب مافي الحكاية لأن مش أي حد هيدربك بمايرضي الله
بس بص :
ممكن تتدرب ف مستشفي حكومي والأفضل تكون كبيرة لكي تتدرب ع كل الأنواع ف التحليل بس عيوب التدريب ف المستشفيات إنك لازم تكون رايح بمعرفة أو لحد معين يدربك وإلا :
هتلاقي تجاهل كبيييير
وتحس إن الدنيا فاضيييه
وحواليك صحراااااه
وقدامك جبل عاااالي يحجب عنك المعلومة كاملة
وتحس بإنك مبلول ع البحر ف ليلة شديدة البرودة
وإنك غريب
ومتطفل
وحاجات تانيه
فيلها “حسها يعني” لوحدك
ولازم تبقي لحووووح جدا جدا وبرضة مش هتلم بكل حاجة0
هتلاقي حاجه إسمها نائب ده طالب إمتياز طب شغال بياخد فلوس وف نفس الوقت بيحضر ماستر ع حساب الدولة العادله ف الإكلينيكال باثولوجي
وحاجه إسمها كيميائي مطحون وحقه ضايع وشعره شايب ولسه بيشتغل بإيده ومرتبه يمكن 358 جنيه و ربع
وحاجه إسمها فني زي العسل ومهيص يعرف بس الطرق وملوش دعوه بما وراء الطرق آخره حط ده ع ده يديك ده
بس أنا بستغرب والله ليه؟
واي؟
بوركواه؟
خريج علوم اللي معاه دبلومه ميبقاش نائب ويشتغل ويحضر ماجستير زي خريج طب؟؟
حد يرد عليا لأحسن هطأ من الإحساس بالظلم
نرجع لتوبيك بتاعنا
الطريقة الثانية:
وهي الأفضل إنك تتدرب ف معمل خاص وتكمل شغل فيه لأنه لو هتسيبه مش هيدربك صح
وأوعي تقول ف أول الطريق إن المرتب قليل لأنه هيكبر مع خبرتك
بس يعني مش هيكبر قوي آخره 457 جنيه و75 قرش
ولكي تتدرب وتستفيد:
إسمع وطرطأ صوابعك
1: دور ف النت ع الخطوات العملي
مواقع كتيير اللي عايز يقولي
2: دور ع دلالات التحاليل
3: إقرأ ومتبطلش 4
:إطبع ورق متبخلش
5: نزل صور وفيديوهات تحت الميكروسكوب وقارن
6: أسأل عن أي حاجة متتكسفش بعد ده كله:
“هتحس ساعات إن الشغلانة دي متعبة ومش مربحة وعذاب وذل بدون تقدير وإنت مش شايف نفسك فيها ولو رجعت بيك الأيام مش هتكمل دبلومة ولا هتتعلم أصلا وتقول ياريتني دخلت تجارة ولا حتي خدمة إجتماعية أو طلعت مبيض محارة …..!
بس ميهمكش ده شعور حقيقي
يوووه
قصدي صحي آآخر حاااجة وكلنا مرينا بيه
أهم مشكلات التدريب:
سحب العينات بس بالممارسة هتبقي أستاذ فيها وبكتر السحب هتبقي رئيس قسم
واللي عايز يعرف أماكن تدريب يقولي …..
فاصل اعلانى:
.
.
اقوى الحلقات ” خد تحليلك ” … ” المختصر المفيد من غير تعقيد ” …. ” دبلومة شبين ” ….” قريبا وحصريا ” دبلومة الميكرو ” …. انتظرونا مع الحصرى والاصلى
.
.
أعزائي الشباب والشابات
الدكاتره منكم والدكتورات
جئناكم اليوم بكيفية إستخراج تصريح مزاولة المهنات
وبعد هذه الأشعار والكلمات
ندخل في الإيمبورتنات
أولا:
وقبل كل شئ لازم تروح نقابتنا الكريمه المبجله القويه علشان تجيب شهادة قيد منها
ودول ما هيصدقو طبعا :
هيدفعوك 50 جنيه لشهادة القيد وأشتراك السنه حوالي 40 جنيه ويدولك شهادة قيد تاخدها معاك وزارة الصحة
“والله ماعارف النقابه دي فايدانا بإيه”
المهم:
ثانيا:
إزاي أوصل وزارة الصحه؟
كالعادة تركب المترو وتنزل محطة سعد زغلول
بعد ماتطلع تسأل علي وزارة الصحة هتلاقيها قدام السفاره التركيه
بعد ضريح الحاج سعد زغلول
“متساش تقراله الفاتحه”
هتلاقي بقي قسم التراخيص كده مستخبي ف ناصيه جوه طرقه ضيقه.
وكده إنت وصلت يامان
أيه بقي الأوراق المطلوبه؟
علي شمالك وأنت داخل هتلاقي لوحه كده فيها الأوراق المطلوبه
وهي آز فولو :
1: نموذج صحه 13
2: فيش وتشبيش (أصل)
3: شهادة الميلاد (أصل وصوره)
4: شهادة التجنيد (أصل وصوره)
5: شهادة قيد النقابه (أصل)
6: شهادة البكاليريوس (أصل)
7: شهادة الدبلومه (أصل)
8: البطاقه (أصل وصوره)
9: عدد 3 صور
10: دوسيه لحفظ الأوراق
تحطهم ف الدوسيه وتروح للموظف ” راجل صعيدي عسل ”
هيقولك هات دمغات هتلاقي واحده ست كده قدام الباب بتبيع الدمغات
” المفروض الدمغات ب 6 جنيه ولكن عشان إحنا ف مصر بتاخد 8 جنيه ”
تدخل للموظف هيدبس الورق ف الدوسيه ويلزق الدمغات ويديلك أصل شهادة الجيش وأصل شهادة الميلاد وياخد صورهم
ويبصلك بإبتسامه ويقولك :
أتصل بينا بعد سنتين !!!؟
وراه هتلاقي ورقه متعلقه عليها أرقام التليفونات دي :
ت: 0227921085
ت: 0227921091
علشان تبقي تتصل وتسأل
حد يسألني عن نموذج الصحه ده بتاع إيه ؟
دي ورقه كده بتاخدها من الموظف وتملي بياناتها وتحطها ف الدوسيه
لحد هنا كده عملت اللي عليك وعداك العيب وسبقك واللي وراه قرب يلحقك
أنتظر بقي يدينا ويديلك طولة العمر
ولعلي أوجزت فأفدت
واللي عنده سوسو ( سؤال يعني ) يسأله وإن شاء الله هجوجو ( هجاوب يعني )
وسلاااااام
التحاليل الطبية 
انتا راااااااااجل محترم