الحلقة 1 :دبلومة الكيمياء الحيوية التحليلية ” شبين ” من طأطأ لسلامو عليكو..!!!

الحلقة 1 :دبلومة الكيمياء الحيوية التحليلية ” شبين ” من طأطأ لسلامو عليكو..!!!

السلام عليكم ورحمة الله وبركاته

 

 

“ياجماعة أنا بطلب من اللي هيقرأ الموضوع وعارف الحاجات دي يحاول يكتب أي نصيحه للطلبة الجدد وبالنسبة للطلبة الجدد أسأل وإحنا نجاوب و أنا لقيت إن الموضوع ده مفكك ف كل منتدي أسئلة وإجابات عابرة فقلت ليه محاولش أشرح الدنيا هتمشي إزاي نتيجة خبرة سابقة وعلي قد ماأقدر وياريت كل الدبلومات حد يحاول يعملها”

 

مع تحياتي

 

أمين جمال أمين

 

 

أولا نحمد الله ونشكره علي ما حابانا به من علم وقدرة علي الاستمرار بعد انتهاء الكلية

 

ثم بعد

 

 

لو أنت طالب لسه مخلص علوم وعاوز تشتغل في التحاليل الطبية وهداك القدر علي ان تكمل دبلومه في الكيمياء الحيوية في شبين فعليك باتباع الآتي

 

 

مرحلة التقديم:

 

 

الميعاد :

 

من 15 / 8 إلي 15 / 9 بكلية العلوم جامعة المنوفية

 

 

الورق المطلوب:

 

شهادة مؤقتة

 

شهادة بيان درجات

 

شهادة التجنيد

 

6 صور

 

( أصول كلها)

 

 

2. طريقة الوصول للجامعة:

 

 

رمسيس >موقف عبود > عربيات شبين > تنزل في الموقف > وتاخذ مواصلات “تجارة جامعة قصر” >تنزل مجمع كليات

 

ع شمالك هتلاقي باب الجامعة أول كلية هي علوم

 

تدخل وتطلع الدور الثالث شؤون الدراسات العليا

 

تاخذ نفسك !

 

 

التقديم:

 

تشتري دوسيه تقديم دبلومة بيو ب 50 جنيه ثم تقعد في مكان هادئ وتبدأ تملي البيانات وتلاقي ورقة كده لازم تتختم ودي علشان تثبت انك مش شغال في مكان عمل “كلام روتين” تأخذ الورقة و تطلع الدور الرابع تمضيه من أي اثنين موظفين و تختمها من مكتب العميد في الدور الثاني

 

كده أنت طلعت الدور الرابع و نزلت الدور الثاني ثم طلعت الثالث ثاني

 

و ع رأي المثل ياطالع التاني مسيرك تنزل تاني

 

” ياريت يبقي معاك قزازة كانز علشان الحرارة و البرستيج ”

 

بعد ما خلصت و ختمت تطلع تسلم الدوسيه عند مدام عبير أو الآنسة رانيا

 

“آخر ذوق و جمال ”

 

 

لحد هنا تمام خالص

 

تشرب الكانز وتاخذ نفسك مرة ثانيه وبعدين تدخل ثاني للموظفة

 

و تسأل :

 

لو سمحتي رقم تليفونك كام ؟ طبعا هتديك رقم الجامعة

 

“ايه رايك في الرخامة دي ”

 

وبعدين تنزل وتركب مواصلات موقف و بعدين تركب ع البيت …. توصل بالسلامة

 

 

2

 

مرحلة الانتظار:

 

 

” كده أنت قدمت و مش عارف هتتقبل ولا لاء طبعا الكلام ده للناس اللي تقديراتها ضعيفة ”

 

 

حاول تقشر بصل أو توم أصعب و يأخذ وقت ولما تخلص المدة في يوم 15 / 9 الساعة 9 صباحا اتصل ع الجامعة

 

 

وابدا الأسئلة :

 

أنا قبلت و لا لا ؟

 

الدراسة تبدأ أمته ؟

 

الغياب نظامه ايه ؟

 

طبعا الرخامة مطلوبة

 

 

مرحلة بداية الدراسة :

 

انزل في بداية الترم الأول أكتب الجدول وعدي ع الشؤون طلع الكارنيه وادفع جزء من المصاريف 1000 جنيه مثلا و أعمل اذن دخول امتحانات الترم الأول

 

اتعرف ع الناس خاصة البنات مش علشان حاجة والله ! بس علشان دول هيظبطوك ع الآخر

 

طبعا في المحاضرات وخلافه

 

ضبط نفسك ع يوم بس أو يومين في الاسبوع وابدا المعركة

 

 

مرحلة الترم الأول:

 

 

هاتلك كشكول محاضرات ب 10 جنيه

 

اشتري الكتب بحوالي 300 جنيه

 

 

ملحوظة

 

 

في مادة علمي واحدة هي هيستوباثولوجي 30 شريحة تعرف و كمنتات

 

باقي المواد العملي بتاعها شيت

 

 

ملحوظة

 

 

“لا تستعجل في تصوير الورق من المكتبات و حاول تحصل ع ورق جديد أفضل + الامتحانات السابقة هامة جدا حوالي 50 % من أي امتحان من الامتحانات السابقة”

 

 

3

 

مرحلة امتحانات الترم الأول:

 

 

حاول في 15 يوم الامتحانات تركز بس في المذاكرة من مصدر واحد إما ورق أو مذكرة

 

 

مرحلة اجازة نصف العام:

 

 

روش نفسك وحاول تعمل اللي نفسك فيه ولو عندك شغل استقيل ومتسألنيش ليه لأن ” ان لبدنك عليك حق ”

 

 

مرحلة الترم الثاني:

 

 

شوف نتيجتك ومتستعجلش روح أول شهر 5

 

كمل دفع باقي المصاريف 1300 جنيه واذن دخول امتحان الترم الثاني وأبدا في المعركة كما في الترم الأول

 

 

مرحلة الامتحانات النهائية:

 

 

حاول تعمل 15 يوم ل الامتحانات فقط

 

 

آخر يوم امتحانات:

 

 

ودع الناس اللي مش هتشوفها تاني

 

لو عاوز تخطب الحق نفسك علشان مش هتشوفها تاني و يمكن متلاقيش زيها و تندم

 

” أحم أحم يابخت من وفق راسين في الدبلومة قصدي ف الحلال ”

 

روح بقي البيت و قول الحمد لله

 

وادع لي بالهداية والصلاح

 

 

 

انتظرونا في

 

 

1. مرحلة استخراج ورق الإفادة والشهادة

 

 

2. ………. عمل كارنيه النقابة و البطاقة

 

 

3. ……. التدريب العملي

 

 

4. ……….. تصريح مزاولة المهنة

 

5…….تقييم مواد الدبلومة

 

6. ………… رفع القضية

 

 

7. ………. فتح المعمل وازاي تشغله

 

.

 

.

 

.

 

والمزيد المزيد

 

12 تعليق

  1. طب لوسمحت بيشترط تقدير ولا ايه ؟؟؟؟؟؟؟؟؟؟؟؟

  2. طيب لو سمحتو حد يعرف الطلبه الى بيتخرجو ترم صيفى بيلحقو يقدمو فى الدبلومه ولا لا ؟

  3. انا عايز اعرف بعد اذنك الدبلومة دى سنة واحدة ولا سنتين اصل انا سالت فى السادات وطلعت سنتين ياريت حضرتك ترد عليا فى اسرع وقت علشان الحق التقديم وشكرا

  4. هيا اتلغت الدبلومه 2014 ولا ايه

  5. انا حاضل على بك علوم و تربية قسم بيولوجى و جيولوجى و اخذت دبلوة سنة واحدة فى علم الحيوان تقدير مقبول – تربية عين شمس ١٩٩٢ – ممكن التحق بدلاومة الكبمياء الحيوية؟

  6. جزاك الله خيرا وجعله فى ميزان حسناتك اللهم أمين

  7. هل بيشترطوا سن معين انا دفعة 2002

  8. السلام عليكم
    بخصوص علوم قسم كيمياء حيوية ……….زهل برضه ينطبق عليها شروط خريجي علوم من حيث عمل دبلومة والحصول علي ترخيص مزاولة مهنة

  9. طب لو سمحت ممكن الواحد ياخد الدبلومة وهو فى الجيش ولا ايه

  10. لو سمحت ممكن تقولي ليه الدبلومات المتوفره لخريجي تربيه كيميا أو بيولوجى ؟ وممكن اعمل دبلومه التحاليل دى من القسمين لو متاحه لخريجي تربيه اصلا ؟ .وشكرا
    ارجو الرد السريع

  11. هو ينفع اروح اقدم يوم 15/9 بكره يعني ولا خلاص كده😦

  12. هى الدبلومة دى مفيدة ف مجال العمل ولا لاء ؟؟ وايه وضع الحضور فيها بالضبط لانى من اسكندرية وهيبقى صعب الحضور بانتظام .. ف ممكن يكون فيه استثناء للطلبة اللى من محافظة اخرى ولا ايه ؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: