الحلقه 5 : من سلسلة حلقات المختصر المفيد من غير تعقيد ..!!!

السلام عليكم ورحمة الله وبركاته

 

 

 

من هنا ستنطلق الاثاره

 

الروعه

 

الدقه

 

والموسيقى من كل كلمه وعباره

 

الاقناع

 

الامتاع

 

الابداع موهبه وليست شطاره

 

الحوار

 

الاختصار

 

الالمام

 

الفهم

 

والتمكن من كل ذلك بجداره

 

الاستمراريه

 

الارتجاليه

 

القمه

 

الربح وليس الخساره

 

الارض الصلبه فى الجدال

 

التواصل بلا انعزال

 

المعلومه كامله وليست منهاره ..

 

كل هذا ويزيد

 

بدون ان نكرر و نعيد

 

وكل يوم هناك جديد

 

فى سلسلة المختصر المفيد من غير تعقيد

 

مع تحياتى :

 

الحصرى

 

العصرى

 

الجامد قوى وشديد

 

الاصلى بجد مش التقليد

 

.

 

وبعد فن الكلمات وترتيب الحوارات سنتكلم اليوم عن الدلالات

 

.

 

Tumour Markers

 

.

 

يعنى ايه ورم ؟؟

 

الورم :

 

هو عباره عن نمو سريع من الخلايا بدون سيطره ولا نهايه

 

طاب هو السرطان ده ليه انواع ؟؟

 

طبعا ليه انواع منه نوعين ورم حميد و ورم خبيث

 

Malignant & Benign Tumour

 

مع العلم ان فيه فروق جوهريه بين الاتنين وهى :

 

1.الورم الحميد Benign T.

 

نموه بطىء+ لا ينتشر من العضو الى اعضاء اخرى ودى الظاهره اللى بيسموها “Metastasis”

 

وانا بقول المصطلح بس عشان ميقولوش مبيعرفش انجليزى … وهما عارفين نفسهم ؟؟؟

 

وكمان الورم الحميد ده ليس له قابليه انه يرجع مره اخرى ودى الظاهره اللى بيسموها “Recurrence”

 

وكمان هنضيف انه ليس مميت مالم يصيب عضو حيوى

 

ومعلومه تانى انه “Encapsulated” مين بقى هيقولى انكببللنبيتيد دى يعنى ايه ؟؟

 

.

 

2.الورم الخبيث Malignant T.

 

عكس بقى اللى فات يعنى سريع النمو + بينتشر من عضو لاخر + وكمان ممكن يرجع مره تانى بعد استئصاله+ مميت + Nonencapsulated

 

.

 

طاب من الاخر كده اسباب الاورام دى ايه ؟؟؟

 

 

طبعا لو انا عرفت السبب الاساسى للورم كان زمانى معايا جايزة نوبل وكان ساعتها اتكبرت بقى عليكو ولا افتكرتكو ورحت امريكا بقى حيث الهىء والمىء والدريبىء…

 

احم احم معلش اصل عينى غفلت شويه وزى ماكون كنت بحلم انى خدت نوبل و و و المهم نرجع لموضوعنا.

 

كنا بنقول ان محدش عرف السبب الرئيسى للورم ولكن هناك عده مسببات

 

منها :

 

المواد الكيميائيه المسرطنه + الاشعاعات + الفيروسات فى مراحلها المتاخره زى B & C

 

وكمان الاشعاعات …. الخ .

 

.

 

طاب عاوزين ننجز بس ونقول ايه يهمنا من الموضوع فى التحاليل الطبيه :

 

هناك تحاليل لمعرفة القابليه للمرض او تطوره او متابعة العلاج ” وهى دى مربط الهورس ”

 

Tumour markers

 

ودى ببساطه كده عباره عن مواد بروتينيه وانزيميه وبيوكيماويه تفرز بالجسم نتيجة الخلايا السرطانيه نتيجة تكاثرها وتندفع لمجرى الدم وتزداد مع تقدم المرض … تمام كل ده كويس نشوف بقى ايه هى الدللات دى :

 

.

 

بس خلو بالكم بقى وركزو معاى :

 

فيه نوعين من الدلالات:

 

نوع يفرز ف الدم او البول او سوائل الجسم

 

والنوع الاخر لايفرز ويبقى على سطح الخلايا المسرطنه او التى بها المرض … ابسطهالكم ؟؟؟

 

يعنى من الاخر فيه دلالات ف السوائل ودلالات ف الانسجه … ابسطها اكتر ؟؟؟

 

لا ماهى ملهاش تبسيط اكتر من كده ؟؟؟

 

كل اللى عاوزكم تعرفوه ان ممكن نكشف عن الدلالات ف الدم او ممكن نكشف عنها ف الانسجه نفسها عن طريق عينه من النسيج او بالابر او غيره ودى اهميتها انها بتدينا صوره عن سلوك الورم فيما بعد …. واللى مش فاهم يقولى .

 

اهم دلالات الاورام :

 

1.Alfa feto protein

 

من اهم الاورام اللى بينتج عنها اورام الكبد

 

2. CA 15.3

 

ناتج عن سرطان الثدى

 

3. CA 19.9

 

ناتج عن سرطان البنكرياس

 

4.CA 125

 

ناتج عن سرطان الرحم والمبايض والرئه

 

5. CEA

 

ناتج عن سرطان عدة اعضاء كالكبد والبنكرياس والامعاء والمعده … الخ

 

6.PSA

 

سرطان غده البروستاتا

 

.

 

ودول اهمهم واكثرهم انتشارهم وليس حصرا لهم .

 

.

 

السؤال هنا NSE دلاله لايه ؟؟؟؟ جاوبى يا روضه ؟؟؟ وبالمره قوليلنا اختصاره ؟؟؟؟

 

.

 

كمان عاوزين نعرف لو فيه حاجات بتاثر ف الدلالات دى ولا لاء ؟؟؟

 

. الحاجات اللى بتاثر ف الدلالات:

 

هنقول اهم ما فيهم وهو :

 

1. ال PSA : بتأثر بالالتهابات ف البروستاتا

 

2. ال CEA : يتأثر بالتدخين

 

3. ال CA 19.9 : يتاثر بالصيام

 

4. ال AFP : يتاثر بالحمل والالتهاب الكبدى

 

.

 

طاب ايه الجديد ف موضوع دلالات الاورام بقى ؟؟؟

 

والكلام ده مش هتلقوه ف اى حته غير هنا :

 

1. ال PIVKA II :

 

وده الطريقه الاكثر دقه لتشخيص اورام الكبد

 

2. ال HER 2

 

وده الطريقه الحديثه لمتابعه ال Prognosis وهى تطور المرض فى سرطان الثدى وتحديد نوع العلاج الكيماوى

 

.

 

ومعلومه كمان اخيره : كل عينات الدلالات سيرم

 

.

 

طاب اياك وانت ماسك ريبورت تحليل لدلالات اورام وتقول للمريض انت عندك سرطان ؟؟؟

 

لان الموضوع بيبقى مبدأى ولسه فيه عينة باثولوجى لازم تتاخد واشاعات وغيره

 

طاب لو اتسألت …. بصريح العباره هتقول ايه ؟؟؟ منتظر اجاباتكم ؟

 

كدا احنا عرفنا الاورام انواعها دلالاتها بابا غنوجها وحذرنا من الفزلكه ف تفسير النتايج

 

.

 

وقبل ما انسى حد بيسالنى تقول ايه للى بينتقدوك ويشتموك برسايل… مش عارف ليه ؟؟

 

اقولهم :

 

” حاجه اخيره انا عاوز اقولها للى شتمو اظن لذيذه كل واحد فينا له ستايله وكل واحد فينا له ميزا وفيه اللى بيعجب واللى ما يعجب واللى ما عاجبه…. ياخد فيزا .”

 

.

 

واللى بيحبو الزياده زى البحور وعندهم العلم زى النور اليكم هذا الرابط :

 

http://en.wikipedia.org/wi

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: