” لمن يريد أن يعمل ف أكبر معامل مصر ”

كتب :

 

أمين جمال أمين

فى 7/3/2010

مقال بهذا العنوان وقال فيه :

.

.

لمن يريد أن يعمل ف أكبر معامل مصر

[[كمل الموضوع للآخر وقول رأيك وتعليقك ]]

المكان:

فرع ف  كل حته فيكي يامصربل و ف بلاد عربيه أخري

الزمان:

منذ بداية التسعينيات وحتي ناو

الوصف:

له هيبه كده وشمخه وتدفع دم قلبك وإنت مطمن عباره عن فروع ومركز رئيسي به وحدات مجمعه

هيماتولوجي/ ميكروبيولوجي/ هرمون/ …….. إلخ

طريقة الشغل:

من فروعه لفرعه الرئيسي ياقلبى دونت بي ساد

بس بصراحه دقه

طحن

فحت

ردم

بس برضه محدش معصوم من الخطأ

نظام العمل:

7 ساعات تمتد ل 8 أو 9 أو 10 دائما لأن الشغل كتير قوي جدا

خالص

ع الأخر

إيكستريملي

الموظفين:

أمن:

ع الباب

ريسبشن:

تقابلك وتاخد بياناتك

سكرتاريه:

تسجل النتايج وتبعتها للفروع

أطباء:

آخر رواقه

كيميائيين:

آخر غلب ” كوكو الضعيف ”

عمال:

لزوم النظافه والذي منه

مناديب:

بيوصلو العينات من الفروع للفرع الرئيسي

الدنيا ماشيه إزاي ؟!!

بص ياسيدي

أولا:

بالنسبه للدكاتره

وهما الاطباء طبعا منهم بيشتغل فول تايم يعني 6 ساعات وكل يوم

ومنهم بيشتغل بارت تايم 3 أيام بس

لهم مكانه واحترام وبرستيج وشمخه و هيبه  ….إلخ

وسمعني سلام العياده

بيعملو إيه …!؟

يقعد زي الباشبوش كده ويمضي بس ع النتايج ويدي كومنت ويراجع علي الشخص الذي يدعي كوكو يعني مثلا لو:

واحد بوزيتيف فيروس بي وسي

الباشبوش يكتب إن لابد من عمل بي سي آر …. وكده يعني

بياخد كام ….!؟

القدماء منهم ألوف

الجدد ألف أتنين وحبه وحوافز وبوسه وأحضان وأرباح وعربيه بمفتاح دا تعب قوي ف الكليه ولازم يرتاح وكل أيامه لازم تبقي أفراح

” اللهم لا حسد ”

ثانيا:

كوكو الضعيف !!!؟

كوكو ده هو الكيميائي

إذا أردت أن تري شخصا مظلوم وراضي فانظر الي هذا الشخص

يعني ايه كيميائي … اللي يعرف يقولي…؟

وقبل ماأتكلم شغلي يابني موسيقي تصويريه أغنية الكيمي كيمي كا

وكمان تريقة سمير غانم ف مسرحية المتزوجون علي حنفي خريج كلية العلوم قسم ذره اللي بيشتغل ف المجاري وأهي كلها ذرات

الاساتذه الكيميائين:

لقبهم كده لو حتي معاك ألف دبلومه و 3 ماجستيرات و 2 دكتوراه برضه لقبك أستاذ وتخرص خالص ومتكلمش ومتجادلش

ليس لديهم شمخه ولا هيبه ولا حاجه من دي خالص نو ديفيرنس بيتوين الكيميائي والخدمات.

حاجه كده زي التمرجيه ف مستشفي عاميه بياع فول وطعميه اي حاجه من الحاجات ديه.

مطحونين بيشتغلو 8 او 9 ساعات متواصله وغير مسموح لهم بالتعب وكأنهم الات لأ وإيه الآلات دي متتزيتش حتي ومتملش ومتكلش و… و ….

أو ع رأي المثل :” أشتغل ياكوكو لحد ماتموت .. تطلع البنت لأمها ”

بيعملو إيه …!!!؟

يستلمو العينات ويدورها ويسلكوها ويشتغلوها ويبوسوها ولو وقعت منه ياويله ياسواد ليله يتهزأ ،

ويتابعو رحله التحليل من أ الي ي لحد طلوع النتيجه ساعتها بيدوها للباشبوش يعمل كومنته عليها

دا غير إنهم بينظفو البنشات والأجهزه ويتخلص من العينات يستلم طلبيات  يراجع نتايج ويرد علي التليفونات  … وإييييه

وحاجات تاني كتير المهم 8 أو 9 ساعات رذع وطحن ع الواقف

ولو فكر يتعب قبل لسانه ما يتحرك يكون:” مخصوملك 3 أيام “”

مخصوملك حافز ”

ومتنسوش نوعية كيميائي سحب العينات :

أنا أول مره أشوف كده

ده شغلته يسحب يسحب يسحب لحد ما يتسحب ويموت ….. الفاااااتحه

وكيميائى الزيارات المنزليه :

دا طيار يعنى زى العيال بتوع الديليفرى كده يتشقلب ويجيب عينات من البيوت ولازم ف المعاد بالضبط

والا هفتح دماغك واخبطك باللى ف رجلى خبط

بياخدو كام …!!؟

حوالي 280 ج أساسي190 ج حوافز لو تأخرت عن معادك دقيقه إنسي ال 190 جنيه

وبعد سنه تزيد 10 ف الميه يعني 28 جنيه بس وهكذاأجازاتك يومين بس ف المنص يحددوهم هما

وإنت تسكت خالص ومتكلمش

ويكأنك مش كائن حي وعندك بيت وعاوز تلعب بلاي ستيشن أو تعمل شات أو تشوف ماتشات أو تظبط ويبقالك حوارات واللي فات سات

يعني إيه …!!؟

سامع حد بيقول ناخد خبره

خبرة أيه

إنت بيدخلوك قسم بس تعيش وتموت فيه

مثلأ: ميكرو

/ كيميا

/ مناعه

/ إلخ

حد يقولي طاب مانا ممكن آخد خبره وأمشي ….!!؟

كان غيرك أشطر دول بيمضوك علي عقودات وشرط جزائي ع بياضعلشان قبل ماتفكر تمشي يا إما تدفع 6 شهور مرتب أو يرفعو عليك قضيه وتسمع بقي

محكمه

…. حكمت المحكمه بالإعدام شنقا علي كل كوكو ضعيف يسيب شغله قبل سنه … وهنهيص

وساعاتها هيطالب ستف المحامين بتعويض أربعين ألف جنيه لأنك ربكت العمل لما مشيت وعجبي

الخلاصه :

اللي عنده طموح ف التحاليل يبعد عن هاتيك اللابس بيكوز أوف:

مش هيتعلم حاجه غير حط ده ع ده وشغل الجهاز ده كده وخلاص

إنت ف المرتبه الأخيره

هتقتل فيك أي إبداع …..

إيه الكلام الكبير ده …!

المهم:

يعني أنا أعرف ناس شغاله بقالها سنين متعرفش الرموز بتاعت التحليل معناها إيه …. وعجبي

وبعدين الإداره عايزه إن الكيميائي يبقي كيميائي والدكتور هو الأساس

حد فاهم حاجه

اللي فهم يقولي

طاب أومال الناس بتشتغل هناك ليه!!؟

فيه ناس بتدبس

فيه ناس زهقت فوافقت

فيه ناس الإسم يغر برضه

يعني يصعب عليك أوي لما يبقي حد كوكو معاه دكتوراه وبيشتغل بإيده ولقبه أستاذ ويبقي عيل صغير أو بنت قاعده ع المكتب يدي كومنت وأوامر بس وعشان إيه ؟ يقولك ده طب وده علووم وضحايا علوم وسلملي علي الكيميا والميكرو والنبات دي كلها هرطقه وتراهات ورسائل ف الهوا وتحضير وماجستيرات وايييه  … وعجبي

مش عارف الناس دي هبله ولا إيه ؟

طاب هو بتاع علوم يوم مايقدم خالص هيبقي إيه ؟

حاجه إسمها سنيور تكنولوجيست يعني يبقي كبير الكوكو ف المنطقه لأن الدكتور مش فاضي يكلم كل الغوغاء

لذلك بيدي أورداراته للسنيور

وهو يبلغ باقي الكوكو

بس هو لو واحده ست هتبقي سنيوره

ونغنيلها بقي ” ماشيه السنيوره كده كده أهو … عايزاله صوره كده كده أهو …!

“والله شر الرزيه ماينهك

قصدي

شر الفليه ما ينشط

ولا بيقولوها إزاي ؟

إذن ف النهاية:

اللي عايز إسم المعامل الكبيره دي ياخد دوره بس

ومش هيستفاد حاجه برضه لان الأجهزه مش ف كل مكان لو حد ناوي يسافر بره زي حالاتي تمام أهو أسمك أشتغلت ف كذا …. و هنهيص

لأنك هتطحن وتدي مجهود خرافي ومفيش شكر ولا جميل

وتاخد ملاليم وتاخد ع راسك

وإنت ع طول غلط

ومقصر

ومكسر

وأوعي تتحسر ع سنين عمرك .

وبعد ده كله :

سلملي علي اللي كان بيحلم ب

“سلسلة معامل ” خد تحليلك ”

بس فيه سؤال بيطرح نفسه

ويقسمها

ويجمعها

ويضربها لحد ماتموت

:

طالما هما بيقولو بتوع علوم ميعرفوش حاجه ف التحاليل

بيشغلوهم ليه … ليه …!؟؟؟؟

حد يرد

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: