مطلـوب كيميائى إدارى

بسم الله الرحمن الرحيم

والصلاة والسلام على اشرف المرسلين سيدنا محمد على اله وصحبه وسلم

.

بدون مقدمات مطوله ملهاش لازمه بجد دى ازمــه  والله احنا فى  مشكلة المشاكل  واقع محبط وتحطيم وتهميش وتجاهل … ومعارف وشروط جزائيه وحوارات متلاقيش ابدا خد ودايما يتقالك  بس هات تعبنا من كتر الآهات

.

كلامى دا له معنى كبير بس اللى يركز فيه ويدوره ف دماغه ويعمل بيه

ايــــــه ايـــــــــه ايــــــــه !!

الكيميائى الادارى

فى اكبر معامل قارة افريقيا واسيا عندهم وظيفة جديده فى الفروع اسمها كيميائى ادارى

ماهى مهام الكيميائى الادارى :

1. يسجب عينات على اعلى مستوى من كل الاعمار ومن مختلف اماكن الجسم ومتنسوش المسحات

2. يشتغل كل عينات الباراسيتولوجى بكفاءه عاليه واتقان وربنا فنان

3. يتابع جدول الحضور والانصراف للموظفين فى الفرع  مش ادارى ؟؟ وانت وانت ولا انتاش دارى

4. يتابع التخلص من النفايات بطريقه امنه ويقابل اى مسئول  وعن كلامى انا مسئول

5.متنسوش طلبية المعمل من اول الانابيب والكيمياويات لحد البلستر اللى بيتحط على دراع البيشنت بعد السحب  ويداديه ويراعيه ويحضنه ويبتسمله ويحتويه .

6. يطمن المريض على النتيجه ويتكلم معاه ويعرف شكوته ويحدد مصيره ومنتهاه واه من اللى بيحصلنا اه اه

 

من الاخر مدير فرع مع ايقاف التنفيذ

 

نوضح الحوار اكتر بالاسئله :

السؤال الاول :  ليه ميبقاش الكيميائى دا مسماه مدير فرع بدل كيميائى ادارى ؟؟؟؟

الاجابه لانه كيميائى مش طبيب

السؤال التانى :  ليه ميبقاش الكيميائى دا مسماه مدير فرع بدل كيميائى ادارى ؟؟؟؟

الاجابه لان بدل مدير فرع 900 جنيه تقريبا فوق المرتب اما بدل الكيميائى الادارى 100 جنيه بس فوق المرتب

السؤال التالت :  ليه ميبقاش الكيميائى دا مسماه مدير فرع بدل كيميائى ادارى ؟؟؟؟

الاجابه لانه لو بقا مدير فرع ممكن يتطاول ويحط بادج مكتوب عليه دكتور / فلان الفلانى  مدير الفرع

السؤال الرابع :  ليه ميبقاش الكيميائى دا مسماه مدير فرع بدل كيميائى ادارى ؟؟؟؟

الاجابه لان فيه مديرين افرع استقبال يعنى ممكن يكون خريج خدمة اجتماعيه او حقوق او تجاره وهو مدير الفرع

السؤال الخامس : ليه ميبقاش الكيميائى دا مسماه مدير فرع بدل كيميائى ادارى ؟؟؟؟

الاجابه خليك فى حالك وكل عيش بدل ماتترفد بدرى بدرى .. كل عيش  كل بقولك  كل لحد مايجيلك تلبك معوى يقلب بغرغرينه وتموت  وترتاح  .. الفاتحــــــــــه

.

ماهو يا جماعه الناس دى عندها حق .. عارفين ليه ؟؟؟

انا اقلكو بس اعيرونى الاذهان وبسرعه لحسن وربنا بنتهان

يعنى انا مدير معمل  اوك ؟؟ عندى معمل ؟؟

انا حاسس انى بقيت ممل ؟؟ ومكرراتى ؟؟ يعنى ايه انا مدير معمل وعندى معمل ؟؟

.

المهم انا عندى معمل وانا راجل دلوقتى يهمنى الفلوس اجيب حد خريج كلية الطب واديله الفين جنيه مرتب وبدل مدير فرع  ب 900 جنيه ويشتغل 6 ساعات بس  ويقرفنى بحقوقه وكدا ؟؟

يعنى هيكلفنى 2900 جنيه فى الشهر ووجع دماغ

ولا اجيب كيميائى  واديله 900 جنيه مرتب وبدل اداره 100 جنيه ويشتغل 8 ساعات  ويسكت ساكت ويفرح كمان

يعنى هيكلفنى الف جنيه بس فى الشهر  وارسم على وجهه بسمه ؟؟

.

شوفتو اقتنعتو ازاى ؟؟؟

وبعدين ماهو كدا كدا كيميائى هيعيش ويموت كيميائى … يبقا نضحك عليه … بمية جنيه … اهو هيفرح بيهم ويزقطط ويقول هيه … ومش بعيد يغنى انا بيه انا بيه انا بيه !!!

مش كدا ولا ايـــــــه  ؟؟؟

.

سامع حد بيقولى تيب هما بيختارو الكيميائى الادارى دا على اى اساس يعنى ايه المعايير للاختيار ؟؟

.

معايير الاختيار ان لا معايير  لا علميه ولا فول وطعميه ان شاء الله حتى يكون معاك من الدبلومات ربعميه وسلملى على بيو وميكرو المنوفيه .

.

اهم حاجه يكون قديم  ومش فهيييم  بس بلاش مبدأ التعميم .. عشان ابقا ف السليم .

.

حد عنده سؤال ؟؟ حد عاجبه الحال ؟؟

طاب حد دفع اشتراك النقابه ؟؟؟

طاب حد قرى قانون المزاوله ولا احنا ف غابه  لاتحترم القوانين  طاب بلاش دى ؟؟

حد يقولى ايه الفرق بين الكيميائيين والفنيين ؟؟؟

.

الموضوع كبير كبير ومحتاج وقت وانا اتخنقت يالا سلام عليكم

.

مع تحياتى الهوارى كيميائى بس  الحمد لله مش ادارى

3 تعليقات

  1. طيب ايه المطلوب رجاء للكيميائى الاداري

  2. عاوزة اتقدم للعمل ده هل ممكن

  3. اريد التقدم لهذة الوظيفة ايه المطلوب

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: