Category Archives: سلسلة حلقات : يعنى ايه ..!!؟؟

الحلقة 1 : من سلسلة حلقات “يعنى ايــــه…؟؟”

معلومات مختصره جديده ليست مبتكره ولكنها مفيده

عن الحياه العمليه ليس من الناحيه التحليليه

ولكنها ماديه

انسانيه

حياتيه

مستقبليه

تهم كل كيميائى  وكيميائية

.

اليكم مثال من السلسله الجديده والحصريه فقط فى جروب تحاليل طبية

.

شعارنا : قريبا سنصل للعالمية

.

يعنى ايــه ” كيميائى زيارات “

.

كيميائى زيارات مهنه جديده ابتكرتها المعامل الكبيره للكيميائيين وهى كالتالى:.

بيكون خريج علوم اى قسم طبعا او خريج معهد فنى صحى وبرضه بيبقى اسمه وتوصيفه الوظيفى كيميائى زيارات

.

مرتبه الاساسى فى حدود كام يعنى :

600-700 جنيه

.

بيعمل ايه :.

بيقعد ف الفرع لحد ما مريض يتصل على خدمة العملاء ويسيب اسمه ورقم تليفونه وعنوانه وتبعت خدمة العملاء الزياره للفرع التابع ليه العنوان فيطبع الاستقبال ف الفرع المتلقى للزياره ورقه فيها بيانات المريض السابقه ويديها للكيميائى ده يتصل بالمريض ويتأكد من العنوان ويركب مواصلات ويروح له او يتمشاها بقى وخلاص… لو مثلا المريض هيعمل تحليل صورة دم كامله  يسحبله العينه ويتصل على فرعه يسأل على السعر لو مش حافظه وليكن مثلا 50 جنيه  ويضيف عليه  قيمة الزياره 15  جنيه ويعمل للمريض ايصال بالمبلع اللى هو 65 جنيه ويرجع الفرع….دا باختصار شديد

.

طاب مصير ال 15 جنيه ايه  

.

عشره جنيه منهم هتضاف على مرتب الكيميائى اخر الشهر وال 5 جنيه الباقيه

 

هتتقسم على الاستقبال

.

طاب ما بيس الشغلانه دى ممكن تظبطلك المرتب

لا ياباشا ركز بقى انت بتشتغل 11 ساعه ف اليوم وكمان  مطلوب منك انك تشتغل ف الفرع اللى انت فيه يعنى ايدك بايد زمايلك

.

طاب ايه عيوبها

عيوبها ان ممكن ينزلك زيارات كتير ف مواعيد متقاربه وانتشر انت بقى واضرب الارض تطلع كيميائيين يسحبو ف المعاد المظبوط وكل مريض عاوزك ف المعاد اللى حدده ولو اتاخرت خصم يوم يومين تلاته وانت ماشى

.

كمان مطلوب منك تارجت لازم تحققه للفرع من الزيارات ومتقليش ازاى وزع بقى منشورات روح للناس بالعافيه علق صورك على ابواب المساجد اهم حاجه انك تحقق

.

طاب ما اهو فيه مناطق كويسه وزيارتها قريبه زى المهندسين مثلا

طبعا اكيد فيه اماكن كده وفيه اماكن مقطرنه بنيله وتعذيب ف زيارتها فقبل ما تشتغل لازم تعرف هتشتغل ف اى منطقه

.

عموما ف اول الشغلانه دى هتموت كل يوم الف مره لانك مش عارف الشوارع وهتقعد تسال وهتوه كل ناصيه وكل شبر وبعد ما تدوس ف المنطقه هتسهل عليك الامور

.

طبعا بهدلة المواصلات واللف ف الشوارع مع اللى بيحب الفلوس يهون اوى

.

من الاخر يعنى مرتبى ممكن يوصل كام؟؟

لو انت شغال هنقول ف منطقه وسط فرعك بيعمل 100 زياره ف الشهر ممكن تظبطلك مرتب بتاع 2000 مثلا او الفين الا حاجه

ولو انت واد حرك كده وليك زباينك والناس عرفاك بالاسم وبيطلبوك ع تليفونك ممكن يبقى اكتر

وهلم جر…حلوه هلم جر دى يعنى بقى ؟؟؟؟

.

.بس كفايه كده عشان متنرفز

.

ياريت ياجماعه لو السلسله الجديده مش عجباكم تقولولى من اولها عشان الغيها من قبل ما تبدأ …..منتظر الردود

واللى عنده اى استفسار يقوله والموضوع متواصل ف الكومنتات

مع تحياتى

الهـــــــــــــوارى

الحلقة 3 : من سلسلة حلقات يعنى ايه ..!!؟.

الحلقة 3 : من سلسلة حلقات يعنى ايه ..!!؟.

من غير لف ودوران ووجع قلب ع الفاضى

.

ღϠ₡ღ اعتــــــــراف بالجميــــل ღϠ₡ღ

.

ساهم كلا من حاتم بيه الجبلى الوزير الطبيب السابق

ومحدش يقول فلول لان الكلمة دى بتنرفزنى

ومستشاره الاستاذ الدكتور**** *****ا

وربنا كان شبه حسين فهمى وبرنس البرانيس كمان

اللى كان صاحب اكبر سلسلة معامل عرفتها البنى ادمين

والاستاذه الدكتوره ***** ***** امينة السياسات ف الحزب الوطنى اللى كان منغنغنا

لولاش بس القله المندسه اللى شالت الريس

..!!ّ

مع انه كان بيحز ف نفسه ولم يكن ينتوى لكن نقول ايه بقى شعب جااااااااااهل

وبنتها الاستاذه الدكتوره **** ****ى

اللى مازالو صحاب اكبر سلسلة معامل ف الميدل ايستى بيوجعنى

.والاستاذ الدكتور***** مش عارف مين ابوه بصراحه

ومعامله اخرها حاجه كده …. دار

. واخرون

. وانا اسف للدكاتره الافاضل لو مش فاكرهم كلهم سامحونى.

ساهمو جميعا ف حل مشكلة خريجى علوم واخرون ووفرو فرص عمل ياجماعه بمرتبات خياليه هو حد لاقى شغل مش احسن ما تشتغل بلطجى او ثائر

 

.وربنا زمان كانت ربعمية جنيه ودلوقتى بقت ستميه يعنى عشرين جنيه ف اليوم مش معقوله

 

ممكن تاكل بخمسه وتركب مواصلات باتنين جنيه هيفضلك 13 جنيه ف اليوم شوف انتى 13 جنيه يعنى هتحوش كام ف السنه ؟؟ اعرفو قيمة الناس دى بقى

..!!

وكمان عملولك ابتكار واختراع جديد سموه

كيميائى تحاليل طبية

 

معدتش الفرقه اللى كانت زمان ان فيه حاجه اسمها كيميائى وفنى لا لا الناس كلهم سواسيه كاسنان الكلب اللى ديله ع طول ملوى وشكل حتى الثورة فشلت انها تعدله

 

يعنى ايه كيميائى تحاليل طبية ؟؟؟

.يعنى تلات انواع :

.

1.كيميائى عينات

2. كيميائى وحدات

3. كيميائى زيارات.

شوفتو التنوع ؟؟؟

.مؤهلاته ايه ؟؟

بكاليريوس علوم ان شا الله حتى قسم بطاطس مهروسه وبدنجان

او

وبكاليريوس زراعه ان شا الله حتى قسم دودة القز العرجه

او

بكاليريوس طب بيطرى ان شالله حتى قسم انثى الحمار الحامل

او

معهد فنى صحى قسم يورن وستول

شوفو التوافق

شوفو الفن ف فرص العمل

.مهامه الوظيفية ايه ؟؟

كيميائى العينات :

يسحب ويسحب ويسحب لحد ما يتسحب ويموت

هنكفر كمان بالموت كلنا هنموت

.كيميائى الوحدات :

يشتغل ع الاجهزه يعمل تحاليل وصيانه وكل حاجه

ياجماعه دا واقف ع جهاز … ههه والله العظيم بيتعامل مع التكنولوجيا هو حد طايل ؟؟

.كيميائى الزيارات:

اى حد يطلب عينه منزلية يتشقلب ويجيبها ف المعاد

ههههههه .. والله العظيم دا هياخد عشره جنيه كاملين عن كل زياره

والنبى تصلو ع النبى لحسن ما يحسد المال اللى الكيميائى بتاعه

.حد يقولى مااهو اشطه اهو هو ده التنوع ف الفرص اومال بتقولو مفيش شغل ليه ؟؟

اقوله ف الزمن الاغبر ده عندك حق . .

وبعدين يعنى ايه دكتور يعنى ايه ؟؟

ياجماعه احنا بنعالج الامور بآليات انا هقنعك :

انت لما بطنك بتوجعك بتقول هروح لمين ؟؟طبعا هروح لدكتور اللى بيبقى خريج ايه ؟؟ طبعا خريج طب ؟؟ طاب خلاص بقى اومال مالك معترض ليه والله العظيم سبحان الله ف طبعك؟؟

.

وبعدين هى استاذ دى وحشه بالله عليك وحشه دا حتى ليها صدى بص قول انا استاذ انا استاذ 20 مره كده وانت هتبقى كويس.وبعدين ياابنى دى ثقافة شعب لما تبقى شركه كبيره وصرح من صروح التحاليل والكيميائيين او الاستاذه الكيميائيين نفسهم بينادو لبعض يااستاذ يبقى ايه ؟؟

 

.دا حتى انك تشذ عن الجماعه دا يبقى حرااااااااام

.

وبعدين الامر انتهى انتى استاذ قدام السكرتاريه قدام الاستقبال قدام الخدمات فاضل ايه قدام نفسك ؟؟ مع الوقت هتبقى قدام نفسك استاذ اخر حاجه

.

وبعدين احمد ربنا احمد ربنا فيه ناس غيرك مش لاقيه شغل

.

ويمكن قريب اترفد بسبب المقال ده .

يالا ان شاء الله محد حوش

.

والحدق يفهم

الحلقة 2 : من سلسلة حلقات : يعنى ايه ..!!؟؟

  • الحلقة 2 : من سلسلة حلقات : يعنى ايه ..!!؟؟

    من قبل Dr-Amin Gamal Amin‏ في تحاليل طبية‏ ·

    اهلا ومرحبا بكم ف البث المباشر للاقناع بالسهوله واليسر .

    هنا لنا تاريخ ملىء بالمعلومات تتهافت عليه دور الطباعة النشر.

    طريقه حديثه للتعلم بدون اطناب او فزلكه او هتش وفشر.

    من هنا وهنا فقط ستجد كل جديد

    مفيد

    مقنع

    موثق

    اكيد

    حديد اى والله حديد.

    و ع فكره اسلوب جامد جدى  وشديد.

    وباقى القافيه بقا مش عاوزين نكرر ونزيد

    .مبحبش ابقى اطنابى

    دا لكلكه فاضيه وشىء منهك ومهلك بل يعتبر عذابى.

    متنسوش الثورة مستمرة يااصحابى

    .

    .

    تحية لصاحب الفكره العبقرية المعادلية

    ذات الصلة الوثيقة بالناحية التحليليه

    د. ياسر طه ومبروك ع الادمنيه.

    وعشااااااااان انا متميز لازم احط معادله متميزه من الناحية العلمية :

    fractional excretion of Na.

     

    ودى بنحسبها كالاتى :

    بقيس الصوديوم ف البول والصوديوم ف الدم واقسمهم على بعض وليكن الناتج = أ

    .

    وبقيس الكرياتينين ف البول والكرياتينين ف الدم واقسمهم على بعض وليكن الناتج = ب

    .

    بقسم أ على ب واضرب الناتج فى 100

    هيدينى قيمة معينه ولتكن ج مثلا .

    .

    لو الناتج أقل من 1.6 اذن الحاله عباره عن

    prerenal azatemia

    لو الناتج اكبر من 1.6 اذن الحاله عباره عن

    acute tubular necrosis

     

    .وزى ما تعودنا ع البساطه :التحليل ده بيتعمل لمتابعة وتقييم  امراض الكلى عامة وكمان ف متابعة علاج المرضى اللى بياخدو مدرات للبول ولكنه ليس اداه تشخيصيه مفرده بل يعتمد على باقى السجل المرضى للمريض.والله اعلى واعلم .والسؤال بقى :هى ازوتيميا دى مش بتفكركوا بحاجه ؟؟؟منتظر منكم الاجابه

%d مدونون معجبون بهذه: