بسم الله الرحمن الرحيم

 

مقدمه:

اولا يا جماعه انا لست اكثركم علما ولكن بالعكس قد اكون من اقل الناس هنا الماما بمهنتى واحاول جاهدا ان اتابع ….. والله الموفق

وانا هتكلم ببساطه ومن غير تعقيد وبالعربى عشان ننجز ف المعلومه … مع انى باخد التويفول دلوقتى عقبال عندكم لكن اى لاف ماى ارابيك لانجويج فيرى ماتش كوره وسله كمان….

اهداء للاخت صاحبة الفكره… قلبها لربها… وياريت تقولنا اسمها ؟؟

خشخشنى فى الموضوع…. ركزو عماى واوعو لحديتى زين

الـــــــــدرن:

الدرن مرض بكتيرى  تسببه بكتريا mycobacterium tuberculosis

معروف منذ القدم وكان المريض محكوم عليه بالموت البطىء .ولكن بعد اكتشاف المضادات الحيويه اصبح مرضا قابلا للعلاج.. ولكن تكمن خطورته فى تكوين سلالات جديده مقاومه للمضادات الحيويه.

 

انواع الدرن:

1. درن رئوى :  يصيب الرئه

2.درن غير رئوى : يصيب اعضاء اخرى من الجسم

 

طرق العدوى :

92% من الرذاذ

7% من الالبان الملوثه ومنتجاتها عن طريق الفم

1% عن طريق خدوش بالجلد تؤدى الى قرح درنيه

……….تمام كده احنا عرفنا العدوى بتم ازاى..!!

 

اعراض المرض :

1.اول الاعراض بتكون عباره عن سعال لمدة 3 اسابيع

2.ولو وصل الميكروب للكلى والجهاز البولى بيؤدى الى سل الكلى ينتج عنه دم والم ف الكلى

3.ولو وصل الميكروب للغدد الليمفاويه بيؤدى الى تضخم هذه الغدد

4.ولو اصاب العظام بيؤدى الى تشوهات ف العمود الفقرى

طاب سؤال لولبى؟؟؟؟؟

هما مين الناس الاكثر عرضه لهذا المرض ؟؟

جيم لولبيه برضه:

والله المرض والشفاء بيد الله ولكن :

1.الاشخاص اللى عندهم سوء تغذيه ونقص مستوى المعيشه

وبالتالى الاطفال المخالطون للمرضى ف المجتمع المتدنى والبيئات الفقيره……** المجتمع المتدنى دى يعنى المجتمع المتدنى…مفهومه اظن !!!**

2.المرضى الذين يعانون من امراض مزمنه وهؤلاء الذين يعالجون بالادويه الكيمياءيه والكورتيزون

3.التدخين والعياذ بالله والخمور

سامع حد بيقولى انجز ولخص وهات المهم…. ماشى..!!!

 

تشخيص المرض معمليا:

اولا:   اخذ العينات:

ا. الدرن الرئوى:

ا. البصاق : يغسل الفم بعد الاستيقاظ مبكرا جيدا وقبل الفطار ولازم تكون خاليه من افرازات الانف واللعاب… ويفضل اخذ ( 3-6 ) عينات

2.غسيل الرئه

3.غسيل المعده فىالاطفال

2. درن الجهاز البولى

يأخذ اول 50 سم من البول عند الاستيقاظ من النوم  … ويفضل (3-6) عينات

 

تانيا : الاختبارات المعمليه:

 

1. التشخيص المباشر بالميكروسكوب:

 

فى البصاق: ويفضل اننا ناخد الجزء الذى به دم او صديد ويتم فرد الفيلم  والصباغه ولكن لايكتشف الميكروب الا اذا كان اكثر من 5 الاالاف ميكروب ف سم المكعب

فى البول: يرسب البول ويصبغ الراسب

2. تزريع الميكروب الدرنى:

يعطى نتيجه ايجابيه اذا كان العدد اقل من 10 ميكروبات ف العينه

طرق التزريع وانواع الميديات………..انظر الكتاب صفحة… ولا بلاش دورو على الصفحه لوحدكو..ّ!!!

3. التشخيص بالاحماض الامينيه :

اسرع الطرق للتشخيص وذلك باستخدام ال PCR   ويتم التشخيص لو كان حتى هناك ميكروب واحد او حتى جزء منه

4.اختبار التيوبركيولين:

يساعد على التشخيص السريع وخاصة فى الاطفال.. ويتم حقن المريض بماده مستخرجه من الميكروب

ويلاحظ مكانالحقن بعد 48 و 72 ساعه ويكون الاختبارايجابى اذا كانت مساحة الورم المتكون من الحقنه 10 مم او اكتر..* بوقليله كده*

5.اختبار Aidinosin Deaminase

والبندنديز ده ..!! انزيم يفرز نتيجة الاصابه ب الدرن ويختبر فى سوائل الجسم المختلفه زى… السائل البللورى والاستسقاء…الخ ونتائجه الايجابيه 95 %

 

*** وطبعا لكل داء دواء …. عاوزين نعرف دلوقتى ازاى ممكن نسيطر على المرض ده والوقايه منه:

الا بجد هو عكس سيطره ايه ؟؟؟ حد يعرف؟؟؟

المهم:

تتم الوقايه عن طريق:

1. تثقيف الناس

2. الاهتمام بالتغذيه السليمه

3. فحص المخالطين

4. التطعيم الفورى

 

طاب نتكلم عنجليزى بقى شويه ولا انتو ايه رأيكو؟؟؟؟

 

Interpretation

كلام فى سركو كده بنبنتيشن دى معناها تفسير نتايج التحاليل

1.اذا كان عدد الميكروب اكبر من 500/عينه:

سيظهر ايجابى فى الفيلم… وايجابى فى المزرعه.. وبالتالى ايجابى فى ال PCR

2. لو كان 10 / العينه  او اكبر :

سيظهر سلبى ف الفيلم… ولكنه ايجابى فى المزرعه…وبالتالى ايجابى فى ال PCR

3. لو كان الميكروب ميت:

يعنى الميكروب موجود بس ميت: سيعطى سلبى فى الفيلم وسلبى ف المزرعه ولكنه ايجابى فى ال PCR

اللى هيقولى ليه هديله هديه ؟؟؟؟؟؟؟؟؟

.

.

اقول انا واخد الهديه لنفسى …: لاننا لو تفتكرو قولنا ان اختبار PCR

بيدى ايجابى حتى لو جزء من الميكروب..

4. لو كان هناك ميكروبات حيه بس مش الميكروب المسبب للدرن:

فى الحاله دى هيدينى سلبى على الفيلم ولكن ايجابى ف المزرعه وسلبى فى PCR

ليه؟؟؟؟؟ ادى ايجابى ف المزرعه؟؟؟؟ لانه فيه ميكروب فعلا بس مش هو ال myco. Tuber.

5. لو ادانى ف الفيلم سلبى وف المزرعه سلبى وف ال PCR  سلبى اذن:…… المريض بيستموت ومفيهوش اى حاجه ويمكن بيكح علشان برد او سجاير او  بينام من غير غطا مثلا……الخ

واللى عاوز يعرف اكتر وبلغة الفرنجه يدخل على الموقع ده:

http://en.wikipedia.org/wiki/Tuberculosis

 

السلام عليكم ورحمة الله وبركاته

المهم انا لم اكن انتوى انى اعمل موضوع تانى بس لقيت ان فيه ست انفار ضغطو عليا اكمل …هما فيه سبعه منهم رجعو ف كلامهم لكن انا كنت خلاص قررت اكمل

نخش ف الموضوع

بعيدا عن التعقيد والنظام والترتيب … احنا هنتكلم ف الحلقه التانيه عن العشوائيه… يعنى اللى هيجى على بالى هقوله… وان شاءالله هنستفاد وادينا بنعلم بعضشينا…!!

نبدا بشوية انجليزى كده عشان الناس تحس اننا فاهمين..!!!

Total quality control management

What do u mean by TQM?

Amanagment  philosophy and approach that focus on process and their improvement as the means to satisfy customer needs and requirments

ايه الكلام الكبير ده ؟؟؟؟… ترجم ياويلد… ماشى

بص يابرنجى بالبلدى كده :

ادارة الجوده الشامله فى المعامل الطبيه:

هى التحسين المستمر لجميع خطوات التحليل لارضاء وتلبية متطلبات المريض والطبيب المعالج

.

.

نتكلم عربى وانتو ترجموبقى:

تنقسم عملية ضبط الجوده الى تلات مراحل:

1. مرحلة ماقبل التحليل…preanalytical phase

2. مرحلة التحليل…analytical phase

3. مرحلة ما بعد التحليل….postanalytical phase

اولا : مرحلة ما قبل التحليل:

عاوزين نفكر مع بعض شويه… ايه الاخطاء اللى ممكن نوقع فيها قبل ما نبدا حتى نعمل التحليل واللى بتؤدى الى ان الدنيا كلها تخرب والنتيجه تطلع غلط وسمعة معملك تضيع وترجع تعيط؟؟؟؟؟؟

1. اخذ العينه:

ايه الاخطاء اللى ممكن تحصل فى اخذ العينه؟؟

كتييير بص ياسيدى:

1. عدم تحضير المريض: يعنى لو مهياتش المريض بشكل جيد ممكن متقدرش تسحب العينه منه اصلا

2.جمع العينات ف الوقت الغير ملائم: يعنى تحليل محتاج صيام اخدت العينه حضرتك وهو فاطر ولسه واكل فول  او سوشى على حسب مكان المعمل…!!!

3.عدم صحة التعرف على المريض وعدم اكتفاء بياناته: يعنى مثلا السن وكده …لان الريفرنس بيختلف!!

4.عدم كفاية حجم العينه المسحوبه …او ان العينه اتلوثت بميه مثلا او كانز لو حضرتك كووول وبتشرب ف المعمل

5. لخبطة مواد التجلط…. طبعا انا مبهزرش فعلا .. تكون عينه عاوزينها اديتا حضرتك تسحبها على فلوريد او سترات او على شوية ميه بقى ما اهو خلاص بقت هيصه… لا طبعا التركيز فيرى امبورتنت ان زيس كيسيس

.

2. تحضير العينه:

ودى مفيهاش رغى كتير …. وهسيبكم تقولى ايه الاخطاء اللى ممكن نوقع فيها اثناء تحضير العينه:

ولا اقلكو لسه هتفكرو …….بلاش اقول انا وخلاص:

يعنى ممكن يكون حصل للعينه hemolysis  او تخزين العينات لفترات طويله فى درجات حراره غير مناسبه او تعرضها للضوء او الرطوبه زى البليروبن مثلا :

حد يقولى ليه البليروبن عينته لازم تتلف فى ورق فويل؟؟؟؟

الا بجد هو البليروبن ده ايه؟؟؟ شغلو الميمورى كده وقولولى انواعه وبنعمله ليه؟؟والجسم بيتخلص منه ازاى ؟؟ ويعنى ايه طفل عنده صفرا؟؟ انا مش هجاوب بجد فكرو انتو ؟؟؟

نرجع لموضوعنا …. اللى هو ايه؟؟؟ ضبط الجوده الشامله ف المعامل…

وقولنا تلات مراحل وشرحنا المرحله الاولى…. نتكلم بقى عن التانيه:

 

تانيا: مرحلة التحليل:

ايه الاخطاء او الكوارث ان صح التعبير اللى ممكن اقع فيها اثناء التحليل:

1. اختلاط العينات: يعينى ع الصبر…. ازاى نحل المشكله دى اننا لازم يكون عندنا تكويد للعينات ف المعامل الكبيره باركود اما ف المعامل الصغنططه بقى فيه برضه باركود بس شعبى بقى وعليهم الحذر

2.استخدام جهاز او طريقه غير ملائمه : هى النقطه دى فيها كلام كبير جدا بس خاص بالمعامل الكبيره.. المهم يعنى مينفعش تحليل اساسه كالاروميترى اروح اعمله تربيدوميترى مثلا …. حد فاهم حاجه؟؟؟؟

ابسطهالكم..

يعنى لازم اعمل التحليل على الجهاز بتاعه …. وللى جاى هيوضح اكتر

3. استخدام محاليل منتهية الصلاحيه: لذلك لابد التاكد من الاكسبيرى ديت

4. الاجهزه المستعمله لاتعمل بكفائه: يعنى لازم اتاكد ان الجهاز مضبوط ومعموله صيانه دوريه وكاليبراشن وكواليتى كونترول.

عندك…. ايه الكلام الكبير ده اشرح يابرنس

ف المعامل الكبيره زى…. او ….. او ….. او سلسلة معامل خد تحليلك… اللى هتتعمل ف الخطه الالفيه الجايه

فيه حاجه اسمها

عينات ضمان ضبط الجوده الداخليه وعينات ضمان ضبط الجوده الخارجيه واللى بيهم نقدر نتلاشى الاخطاء اللى بتحصل اثناء التحاليل ” مرحلة التحليل ” واللى بتبقى ناتجه عن عيب ف الجهاز

اوضحهالكم اكتر:

1. internal quality con.

هى عباره عن عينات معلومة التركيز يتم ادخالها على الاجهزه قبل ادخال عينات المرضى يوميا

اذااعطت نتائج ف حدود المسموح يبقى تحط عيناتك وتشتغل وانت مطمن

اما اذا اعطت نتائج خارج المسموح يبقى لازم تشوف العيب فين بدأ من صيانة الجهاز والتاكد من سلامة المحاليل ….. الخ المهم تضرب الارض تطلع نتايج ف المدى المسموح والا ماتشتغلش على الجهاز ده اساسا

.

.

حديث جانبى :

هو ايه القصه دى : القصه دى عباره عن مواد معلومة التركيز ف المستوى الطبيعى والمرضى مثال precinorm & precipath   النورم كعينة شخص سليم معلومة التركيز والباس كعينة شخص مريض برده معلومة التركيز احطهم على الجهاز بعد عمل الكاليبريشن طبعا واشوف النتايج لو طلعت ف المدى المسموح اقدر احط عيناتى وانا مطمن… ولكم ان تتخيلو لو اخدنا مثال بالسكر مثلا عملنا الكاليبرشن وبعدها الكواليتى بالنورم والباس … فمثلا النورم المدى المسموح بتاعه من 10-25 مثلا طلعت نتيجته 30 اذن كل نتايج السكر اللى هتتحط على الجهاز هتطلع اعلى من الطبيعى بنسبة ال 5 الزياده لو لم نعالج الخطا …. وهكذا ف النقص

2. external quality con.

منها نظامين:

أ.نظام الجوده الامريكى CAP excel

وده اختصار لايه حد يعرف…. بجد المره دى فيه هديه؟؟؟

ب. نظام ضبط الجوده البريطانى RIQAS

من اسمه يعنى بريطانى

العينات دى بترسل من الخارج للمعامل يعملو لها التحاليل وترسل النتايج ليهم تانى يقارنوها بالنتايج عندهم  والتى لها نفس الظروف كالجهاز والطريقه

عرفتو بقى يعنى ايه ريكس وايزو اللى واجعين دماغنا بيهم؟؟؟

طبعا المعامل الصغنونه تعمل برضه ريكس وايزو بس مع المعامل اللى جنبها يعنى بتاع الشرابيه يبعت امبابه وبتاع المنشيه يبعت المطريه وزيتنا فى دقيقنا وكده…. وربنا يستر!!!!!

تاتا : مرحلة مابعد التحليل:

من الاخر كده المشكله ف الجزء ده…. هى نتايج غلط

ونحلها كالتالى:

1.لازم حد يكون متمكن وفاهم صح يراجع نتيجة التحليل كويس ويمضى عليها … ولازم يكون طـــــــ……. ولا بلاش لحسن اضرب

2.ولازم تكون النتايج متوافقه مع بعضيهاومع السجل المرضى ومع النتايج السابقه…. الخ

3.ولازم تكون النتيجه خاليه تماما من اى اخطاء هجائيه او املائيه…انتو فاهمين طبعا .

نختم بقى عشان انتو اكيد اتخنقتو منى :

يعنى ايه ايزو ISO   ؟؟؟؟

بالبلدى كده ومن غير تعقيد ده نظام مراقبه وجوده بتطبقه المعامل الكبيره عشان تتاكد ان القواعد اتطبقت على التلات مراحل للجوده اللى احنا قولناهم…. اللى هما ايه بقى؟؟؟؟ لا دا نتو نايمين خالص ؟؟ حد يجاوب؟؟

وكمان بتعمل دورات مستمره للتدريب العاملين وبتراقب الاداره وادائها …. وكده يعنى

.

.

انا سألت عده اسئله اللى مش فاكر على الاقل تلاته منهم يبقى لم يقرا بتركيز!!!!!!!!

شكرا اند باى باى وانتظرونا ف الحلقه القادمه ان شاء الله

بسم الله الرحمن الرحيم

والصلاة والسلام على اشرف المرسلين سيدنا محمد على اله وصحبه وسلم

.

.

ام بعد

بجد والله حاجه تنرفز يعنى ايه يحرقو كنيسه مااهو كده ممكن كمان المتعصب من المسيحين يقولك ناخد تارنا ونحرق مسجد وندخل فى دوامه بقى بين مسلم ومسيحى على الرغم ان والله العظيم انا شفت المسيحين والمسلمين واحد فى ميدان التحرير وكان ليهم خيام جنبنا.. وكنا بنقسم الاكل مع بعضنا……. ده كان تعليق على حريقة كنيسة امبابه…. وربنا يستر.

.

.

بعد ما الحلقه الاولى والتانيه عملت نجاح منقطع الجرجير… قلت اعمل الحلقه التالته … بلا تعقيد ولا كلاكيع ومن النهرده هنقول للكلام الكبير…

طـــير انت

.

.

هنتكلم النهرده عن مرض السكر ” بس بدون اى مصلحات انجليزيه ولا غيره… كلنا اتهرينا مصطلحات فى الكليه… هنتكلم ببساطه…. كالعاده.

.

مرض السكر Diabetes Mellitus

مقدمه:

مرض السكر من اكثر امراض الغدد الصماء انتشارا

مرض السكر له تاثيرات ضاره على كل الاجهزه الحيويه بالجسم ” الكلى . القلب. الاوعيه الدمويه … الخ

اعراض ارتفاع مرض السكر ف الدم Symptoms of hyperglycemia

هنقسم الاعراض الى نوعين :

1. اعراض شائعه:

الجوع المستمر . كثرة البول. العطش المستمر

ودى الاعراض اللى ممكن يكون بيشتكى منها المريض لما يجى يعمل عندك التحليل تساله عنها.

2. الاعراض غير الشائعه:

اضرابات النظر . الاجهاد المستمر. فقدان الوزن . تأخر شفاء الجروح. جفاف اللسان . الالتهابات المتكرره….. الخ ودى عادة بتحصل اكتر فى الحالات المتاخره

.

أنواع مرض السكر :

انا عن نفسى بقسمهم ببساطه عباره عن  3 انواع كالتالى :

1. مرض السكر المعتمد على الانسولين:

ناتج عن وجود خلل فى الجهاز المناعى حيث انه يفرز اجسام مضاده للغدد التى تفرز الانسولين

شائع فى الاطفال

وهذا النوع له قابليه وراثيه  يعنى من الاباء للابناء … وكده

وقد يحدث  نتيجه عمليات جراحيه ف البنكرياس

يعالج هذا النوع بحقن الانسولين فقط

 

2. مرض السكر الغير معتمد على الانسولين:

نسبة الاصابه بهذا المرض حوالى 90% من  حالات السكر

يحدث عادة فىالكبار عند سن الاربعين

بيكون ناتج عن  قابليه وراثيه ونمط غذائى غير سليم

قد يصاحب هذا النوع  مستوى طبيعى للانسولين ولكن يحدث له insulin resistance

طاب حد يقولى ليه؟؟؟؟؟؟؟؟

تحدث المقاومه لنشاط الانسولين نتيجه لخلل فى مستقبلات الانسولين insulin receptors

على سطح الخلايا المختلفه سواء دهنيه او كبديه ….. الخ

يعالج هذا النوع عن طريق تنظيم الغذاء وادوية خفض السكر بالفم واحيانا بالانسولين

 

3.مرض السكر الثانوى:

ناتج عن مسببات اخرى مثل * الحمل …. مايسمى سكر الحمل فى التلات شهور الاولى من الحمل ثم ينتهى… لان هرمونات المشيمه تعارض عمل الانسولين فى بعض الاحيان

*استخدام بعض الادويه كالكورتيزون وادوية المدره للبول.

*الاصابه ببعض امراض الغدد الصماء … مثال ال acromegaly   وده مرض بيبقى ناتج عن خلل فى الغده النخاميه مما يزيد من هرمون النمو … وباقى القصه اللى انتو عارفينها

والسؤال هنا للناس اللى مشغله دماغها ؟؟؟ ماهو اسم المرض الناتج عن نقص هرمون النمو؟؟؟؟ وماهى اعراضه ؟؟؟؟؟

Ssssssssssssssssssstttttttttooooooooooooooooooppppppppppppppppppp

 

اتكلمنا عن المرض واعراضه نيجى بقى للى يهمنا نحن اخصائى التحاليل الطبيه:

التشخيص المعملى لمرض السكر:

اول حاجه انت قاعد فى المعمل فى الريسبشن مرتاح عمال تفكر فى احوال العلميين والاعتصامات والاطباء والصيادله وبتقول كان يوم بلاك لما دخلتها مع انك شغال وتمام … وبتتفرج على فيلم ذا داى افتر تومورو على ال ام بى سى .. والساعه داخله على 2 ظهرا وبتقول امتى بقى تيجى الساعه 4 عشان اروح…

.

فجاه دخل عليك بيشنت بيقولك انا بحس بعطش كل شويه وبروح الحمام كتير ووالدتى عندها سكر …. وعاوز اشوف الدنيا من الاخر كده انا عاوز اعمل كل تحاليل السكر

.

اول حاجه هتقوله انت صايم ولا لاء

هيقولك لاء

هتقوله : انا هعملك سكر عشوائى :

1.سكر عشوائى random blood suger

تسحب الانبوبه اللى فيها NaF  وتسحب العينه      وتعمله التحليل   وتشوف النتيجه على حسب الريفرنس اللى انت بتستخدمه اللى بيكون (….-…..) مجم / دل

    2. سكر صايم fasting blood suger

طبعا تمشيه وتقوله تعالالى بكره ولازم تكون صايم 8 ساعات

تسحب العينه برضه على Naf وتعمل التحليل وتشوف النتيجه

    3. سكر بعد الوجبه بساعتين: post prandial blood suger

بعد ما سحبت عينة الصايم تخليه يفطر وتحسب ساعتين بالضبط وتسحب العينه التالته

يفضل ان المريض ينتظر فى المعمل الساعتين واهو منورنا …

    4. اختبار منحنى السكرG. Tolerance Curve

وده عباره عن قياس السكر فى الدم + البول ورسم علاقه…… طبعا محدش فاهم حاجه؟؟

نبسطهاااا

الاول هناخد عينة دم صايم وعينة بول فى نفس الوقت

وبعدين ياخد المريض جرعة الجلكوز او يفطر وناخد عينه دم وعينه بول بعد الفطار ب نص ساعه

ثم دم وبول بعد ساعه … ودم وبول بعد 2 ساعه …. ودم وبول بعد 3 ساعه

اذن عندنا خمس عينات دم وخمس عينات بول ….. تمام ولا توهتو منى ؟؟؟؟؟؟؟؟؟

ركزو بس وان شاء الله هتفهموه؟؟؟؟؟؟؟؟؟؟

هنعمل ايه بقى فى العينات:

1. هنقيس السكر فى الدم quantitative

2. هنقيس السكر فى البول qualitative  يعنى نقول + او –  بس

نسجل النتايج فى جدول ونبدا نرسم عمود راسى عليه تركيز السكر فى الدم وعمود افقى عليه الوقت اللى هو 1/2  1  2   3    وطبعا الصائم هو نقطة الصفر.

ونحدد على الراسى العتبه الكلويه renal threshold

 العتبه الكلويه Renal threshold

* وهى اقصى تركيز للسكر فى الدم يمكن ان يحد له reabsorption فى الكلى دون نزول سكر فى البول   وهو 180 mg/dl

ونشوف بقى النتايج:

ومرفق صوره لتوضيح كيفية تفسير النتايج  وتوضيح رسم المنحنى وكل حاجه

5. تحليل الفركتوز امين Fructoseamine

هو عباره عن  جزء من الجلكوز المرتبط بالالبيومين ويجرى بصفه شهريه لانه بيدينا مؤشر عن حالة السكر خلال شهر

6.قياس الهيموجلوبين السكرىHb (A1C)

وهو عباره عن جزء من الهيموجلوبين موجود داخل كرات الدم الحمراء ويعطى فكره عن حالة السكر فى اخر تلات شهور اللى هى عمر كرات الدم الحمراء

7. قياس نسبة البروتين المتناهى الدقه M.A.U

الاول حد يقولى الاختصار اللى انا كتبته ده لايه ؟؟؟؟؟؟؟ وليه هديه

وده بيدينا موشر عن مدى تاثر الكلى بمرض او ادوية السكر وبنعمله بصفه دوريه كل 3 شهور

8. مستوى الانسولين insulin level

قياس مستوى الانسولين مع السكر الصايم او منحنى السكر … بس ده له عيب خطير انه مبيفرقش بين الانسولين الداخلى المفرز بواسطة البنكرياس  والخارجى المستخدم كعلاج… لذلك لو مريض بياخد انسولين هيزود المستوى.

9. قياس السى ببتيد C Peptide

وف التحليل ده بنتلاشى الخطأ اللى ممكن يحصل فى قياس مستوى الانسولين ” التحليل السابق”

لان السى ببتيد يطابق نسبة الداخلى  المفرز من البنكرياس ولا يتاثر بالخارجى

.

اذن الفرق :

Ins. Level:

بيقيس الانسولين الداخلى ولكن لو المريض بياخد انسولين هيقيس الاتنين الداخلى والخارجى

C Peptide:

بيقيس الانسولين الداخلى فقط حتى لو هناك انسولين خارجى

.

اللى مش فاهم يقولى وانا اشرحها تانى

.

10.اجسام المضاده للانسولين Insulin Ab

للكشف عن الاجسام المضاده اللى بتتكون ضد الانسولين الخارجى لان الجسم يتعامل معه كأنه ماده غريبه وعادة تحدث مع الانسولين رخيص الثمن.

.

.

كده احنا عرفنا حاجه عن كل حاجه متعلقه بتحليلات السكر واللى عاوز يقرأ اكترويتعمق تمام مفيش مانع بس دى عباره عن ريفريش للمعلومات …. وادينا بنعلم بعضينا

.

.

منظر الاجابه على الاسئله اللى انا سالتها فى الحلقه … والهديه جاهزه

 

وادى الصوره بتاعت منحنيات السكر بس” الرسم كروكى ”

 

.

.

التفسير :

الحاله 1. ارتفع السكر ف النص ساعه الولى ولكنه لم يتعدى حاجز العتبه الكلويه ثم يرجع طبيعى بعد افراز الانسولين من البنكرياس

الحاله 2. ارتفع السكر ف النص ساعه الاولى واستمر مرتفعا مع ظهور سكر ف البول

الحاله 3.يوجد جلكوز ف البول ولكن مستواه ف الدم طبيعى نتيجة اضطرابات فى الtubular reabsorption

الحاله4.توضح عدم قدرة الامعاء على امتصاص السكر او زياده ف افراز الانسولين او امراض فى الغدد

الحاله 5. تحدث زياده فى مستوى السكر ف النص ساعه الاولى ثم يرجع طبيعى نتيجة:

Rapid absorp.of G from intestine

Or

Delayed response of insulin

 

وادى الصوره بوضوح اكتر

http://www.facebook.com/photo.php?fbid=2086843815926&set=o.196507333701434&type=1&theater

يارب اكون افدتكم على اد ما اقدر منتظر الردود والاسئله

 

وده لينك كمان شرح للمنحنى بمقطع فيديو

 

http://www.youtube.com/watch?v=jEbO7HjPxLI

السلام عليكم ورحمة الله وبركاته … اولا الموضوع طويل بس خفيف وهتحس انك عاوز تكمله للاخر وان شاء الله تستفاد منه ……… نسالكم الدعاء

اكيد طبعا كلكو عاوزين تعرفو هنتكلم عن ايه فى التحاليل النهرده

انا قولت نكسر الملل ونتكلم عن حاجه تانى علشان نحسن دخلنا شويه ونجيب كام جهاز كده للمعمل ونعمل دعايه

واهى شغله مؤقته لكنها مربحه

.

ايه رايكو يادكاتره نتكلم النهرده عن مهنة الميديكال ريب :

اولا يعنى ايه ميديكال ريب؟؟

ج. ميديكال ريب اختصار للكلمه الانجليزيه Medical representative

ودى معناها بالعربى مندوب دعايه طبيه.. وظيفته انه يسوق منتج طبى ويخليه يشتغل قد يكون هذا المنتج دواء وهو الشريحه الاكبر او جهاز طبى او … او …. الخ

المهم انه حاجه لها علاقه بمهنة الطب

ثانيا ايه مؤهلات الميديكال ريب ده؟؟

اول حاجه لازم يكون معاه مؤهل علمى اكيد يعنى مش بطيخ يعنى طب .. بيطرى .. صيدله .. علوم… زراعه فى بعض الاحيان

تانى حاجه لازم يكون له قدرات شخصيه هامه زى الاقناع .. الثقه بالنفس.. التحدث باللغه الانجليزيه بطريقه جيده.. عدم رهبة التحدث فى وجود عدة اشخاص .. صوت واضح… مهندم فى الملابس…الخ

تالت حاجه ودى الاهم انه يكون بيعرف يحتوى اللى قدامه يعنى لو قابلته مشكله يعرف يحلها ” ميغرقش فى شبر ميه ”

الحاجه الرابعه والاخيره انه يكون قادر على تكوين علاقات مع الناس بسرعه عشان يعرف ينجز فى شغله.

ثالثا: يعنى ايه اشتغل ميديكال ريب؟؟ بيعمل ايه يعنى؟؟

فلنفترض انك شغال فى شركة ادويه اسمها ” فيس بوك ” مثلا .. وشركة الفيس بوك دى لها منتج اسمه “جروب” مثلا حضرتك زى الشاطر هتعرف كل حاجه عن المنتج ده من الالف للياء يعنى تركيبته ودواعى استخدامه وجرعته …. الخ وتلم بكامل الموضوع وتبدأ تنزل للدكاتره طبعا فى الشركات المحترمه بيبقى فيه قائمه بااسماء الدكاتره اللى انت هتزورهم تستأذن الاسيستنت وتدخل للدكتور وتعرفه بنفسك وباسم شركتك وتكلمه عن المنتج ومميزاته وتقنعه انه يكتبه فلما يكتبه الصيديليات تطلبه فلما تطلبه الشركه هتبيعه … وادى كل الحدوته باختصار.

نمسك بقى الموضوع حاجه حاجه:

اولا يعنى ايه شركة ادويه؟؟

شركة ادويه يعنى شركه زى اى شركه متسجله ولها رقم تجارى وموظفين وكده

والشركات نوعين:

شركه لها مصنع : ودى بتبقى شركه لها مصنع ومنتجات وبتوزع المنتجات دى بنفسها ودى الافضل لانها دائمه فى السوق

شركه ليس لها مصنع: مايسمى بمكتب علمى يعنى انا افتح مكتب واروح اتعاقد مع احد المصانع اللى بتنتج دواء معين واخد منها كميات واشتغل عليها دعايه وليا نسبه وهى لها نسبه وتمام

طايب تمام .. من الاخر كده انا طالب علوم لسه مخلص وعاوز اشتغل ورحت قدمت فى شركه ايه اللى بيحصل؟؟

هتقدم عادى هيعملولك انترفيو عادى على حسب بقى اللى بيعملك الانترفيو هيحاول يشوف ثقتك فى نفسك لبسك طريقة كلامك مدى اقناعك خلفيتك العلميه واللغه اخبارها ايه وكده.

وبعدين:

ربنا اراد وقبلوك وانت واد منظم وواثق من نفسك ولهجتك حلوه وعندك معلومات علميه والمصطلحات عندك تمام .

هتبدأ فترة تدريب مش كبيره هتكون عن المنتجات ” كل ما يخص المنتج” وعن ازاى تقنع وازاى تتكلم ماتخافش وطريقة الشغل وكده

وبعدين هتبدأتنزل حاجه اسمها ” دبل فيزت” او ” صيلنت فيزت” مع حد شغال تشوفه بيعمل ايه من غير ما تتكلم

وبعدين يبدا ينزل حد معاك وانت تتكلم بحيث انك لو غلطت هو يلحقك ويصححلك وكده لحد ماتثبت ومتخافش والدنيا تمشى معاك

كل ده تمام خلصت فترة التدريب وبيس نبدأ الشغل بقى ولا ايه ؟؟

بفرض انك هتاخد منطقة المهندسين مثلا:

الشركه هتديلك جدول تمشى عليه يعنى النهرده ش جامعة الدول تزور الدكتور فلان وفلان وفلان … الخ

بكره ش البطل احمد عبد العزيز تزور الدكتور فلان وفلان وفلان… الخ

المهم هيكون عندك على الاقل قائمه فيها 100 دكتور كل يوم على الاقل تزور عشره منهم

طبعا العيادات بالليل والمستشفيات الصبح؟؟

يعنى لو انت شغال “فل تايم” يبقى بجانب القائمه اللى فاتت دى هيكون معاك كمان قائمه باسماء مستشفيات كل يوم الصبح تزور مستشفتين على الاقل

.

.

تلخيص:

الفل تايم: تشتغل الصبح من الساعه 9 مثلا لحد ماتخلص زيارات يعنى ممكن لواحده كده مثلا

وبعدين تروح البيت تنام كده وتروق وتنزل على الساعه 7 او 8 زيارات العيادات الخاصه

البارت تايم: تشتغل بالليل بس على زيارات العيادات الخاصه وخلاص من الساعه 7 او 8 لحد 11 مثلا او على حسب ما تخلص

.

.

طاب والله تمام اخر حريه واحلى عيشه ؟؟

لا خلى بالك انت بتشتغل 5 ايام فى الاسبوع واليوم السادس اجتماع تعرض فيه ريبورت باسماء الدكاتره اللى انت زرتها ويوم الجمعه اجازه طبعا

.

طاب ما اهو انا ممكن اكتب اسماء من دماغى حد هيعرف؟؟

طبعا فيه حاجه اسمها سوبر فيزور بيراجع عليك وبينزلك عشوائى ولو اكتشف انك مازرتش الدكتور الفلانى وانت كاتب انك زرته يبقى ” فولس فيزت ” وبره يابرنس

.

وكمان ليك تارجيت معين لازم تحققه للشركه يعنى لازم تحقق ميعات للمنتج على الاقل بكذا لو محققتش ممكن تطير برضه ويبقى انت مش شغال

.

المرتبات كام ؟؟

معظم الشركات فل تايم مش اقل من 1300

وبارت مش اقل من 800 دى اقل حاجه

.

بعد ماعرفنا الحاجات اللى حوالين المهنه نعرف بقى ازاى الميديكال الشاطر بيشتغل:

.

اول حاجه لبس البدله والكرافته وحط البارفان وروش نفسه حضر الشنطه فيها البروشور وعينات الدواء وحدد هدفه النهرده مثلا الشارع الفلانى ونزل:

اول حاجه بيعملها لو كانت اول مره ينزل الشارع يسأل عن التخصصات اللى هو عاوزها عند الصيدلى :

” وبيكون السؤال كالاتى: بقول لحضرتك ايه هو مين هنا اقرب دكتور يكون عظام” او التخصص اللى انت عاوزه” يكون كويس ؟؟ هيقولك فيه هنا الدكتور فلان وفلان تسجل عندك وتروح للدكتور تزوره

اما انت بقى لو عندك قائمه يبقى تمام

ولو مش اول مره تنزل الشارع اول حاجه تعملها تروح لاقرب صيدليه للدكتور اللى انت هتزوره وتسال الصيدلى هو الدكتور فلان بيكتب الدواء الفلانى ولا لاء؟؟ هيقولك اه او لاء

طبعا لو اه يبقى تروح للدكتور تشكره وتفكره بمميزات الدواء بسرعه وتقوله عاوزين ” مور سابورت” يادكتور

اما لو لاء يبقى يااما الدكتور نسى اسم الدواء يااما ما اقتنعش تروح بقى تحاول تقنعه وتاكد عليه

وهكذا لحد ما تكمل 10 او 11 زياره ف اليوم

.

تلخيص

.

الصيدليه < الدكتور< الصيدليه< الدكتور….. هى دى الخريطه

.

طاب ازاى اعمل call ناجحه؟؟؟

.

1. Precall………

Like:

1. Feedback from pharmacy:

اللى هى قولنا انك بتروح الصيدليه تشوف الدكتور الافضل الدكتور اللى بيكتب الدواء الدكتور اللى مبيكتبش وكده

2.Determine Sp. & Drs

ودى القايمه اللى انت بتعملها او اللى الشركه بتديهالك

3.Prepare your tools

كرافتتك بدلتك بروشورك جذمتك عيناتك بابا غنوجك تليفونك … الخ

4.practice

يعنى تقعد مع نفسك كده تشوف هتقول ايه للدكتور ويفضل انك تعمل محاكاه للكول مع حد عشان تحسن ادائك

2. Presentation……………..

Like:

1. Approch……

Consist of:

a. Ice Breaker

اللى هى السلام عليكو ازيك يا دكتور او مساء الخير التحيه يعنى

b. IBS ” initial benefit statement”

ودى لازم تكون اقل من تلاتين ثانيه عشان تلفت نظر الدكتور وبتبقى عباره عن ” مشكله .. الحل… اسم المنتج…تركيبةالمنتج”

مثال” اكيد يادكتور بتقابل حضرتك حالات ربو شعبى… هيقولك ايون..هتقوله انا جايب لحضرتك النهرده حل وهو… اسم المنتج بقى وتبدا تنطلق

2. Body of Call

ودى بتكون عباره عن:

Feature…….>>>>>….. Benefit

يعنى مثلا المنتج بتاعنا Broad Spectrum وبالتالى هيقضى على جميع انواع البكتريا

وكمان لاحظ التالى:

لازم تحاول تقول اسم المنتج بتاعك على الاقل 10 مرات عشان الدكتور يحفظه

لازم تعلى صوتك علشان الدكتور يسمعك كويس

3.Pre-Close:

ودى قبل ما تنهى الكول تسال الدكتور سؤال مفتوح مثلا اى رأى حضرتك ف مادة كذا اللى بيتركب منها الدواء؟

هيرد تمام ماده كويسه….. او هيعترض ويقول لا والله دا الماده دى بتعمل كذا… تبدا انت تحتوى الاعتراض ده وتقنعه … طبعا مش باى كلام لازم يكون كلام منطقى….. ودى بيسموها Handling of Objection

.

4. Close:

من الاخر قبل ما تمشى تحاول تاخد وعد من الدكتور انه يكتب الدواء

مثلا” ياريت يادكتور ف اول بيشنت يقابلك عنده” اسم المرض” يكون اول حاجه تكتبهاله ” اسم المنتج”

طبعا هو هيرد ان شاء الله

.

بس كده وتقول سلام عليكم وتمشى وهكذا

.

عيوب الميديكال ريب؟؟؟

1. معظم الشركات من غير عقد يعنى فاى دقيقه باى يبقى باى

2. محتاجه لف كتير

3.

4.

كملو انتو بقى؟؟؟

مميزات الميديكال ريب؟؟

1. مرتب عالى وبعض الشركات عربيه وكده

2.

3.

كملو انتو بقى

” بكده يكون اللى عاوز يشتغل عرف هو هيعمل ايه بالتقريب وطبعا ده مش كل حاجه عن الميديكال انا اتكلمت باختصار واكيد نسيت حاجات

واللى عنده سؤال انا مستعد

سؤال الحلقه:

وردت كلمة بروشور اكثر من مره

مامعنى هذه الكلمه وفيما تستخدم؟؟؟

.

الهديه جاهزه

.

مستعد لاى استفسار

فى الليل قبل النهار

معاى مش هتحتار

هديلك حلول وافكار

هحذرك قبل ما تاخد قرار

وترجع تندم وتنهار

دى تجارب زمن غدار

وسباحه فى بحر الاقدار

مع الخفه والبسمه والازهار

وسمعنى طبله ومزمار

 

لسلام عليكم ورحمة الله وبركاته

اعزائى الساده اعزائى الحضور النهرده بقدملكم حلقه جامدى جدى وستى والعيله كلها .

وبعد ما تبين لنا ان هناك عباقره ومبدعين عاوز اقولكم انى اتطمنت على الجروب واقدر اوافق على عقود الاحتراف اللى جايالى من جروب العلميون اون لاين والعلميون المتحدون والعلميون بحثا عن كيانهم وكمان جروب نقابة المهن العلميه ناهيك عن السوهاجيه وجروباتهم وعارضين عليا 200 كومنت و 100 لايك على اى موضوع ينزل … وانا بفكر لسه ؟؟.

كانت تلميذتى اللى مربيها على ايدى ” روضة الجنه ” من ايام ما كانت ” قلبى لربى ”

حطت اسمى ف جدول الشرح وانا قولت هنتنافس مع بعض ونشوف مين يكسب

عموما انا بهديلها الحلقه دى

وبعيدا عن حزلقوم وعبقرينو

سيبك انت الاصلى اصلى ودايما جديد حصرى شامل تام كامل ومعلومات حديد بدون تقليد اسلوب جامد وشديد

ركز ف اللى جاى وكمل ومتزهقش هتستفيد

تحليل السائل المنوى

Semen analysis

.

انت قاعد ف المعمل لا بيك ولا عليك جالك حد كده داخل ومكسوف حبتين وبيسال بصوت واطى وبيقول عاوز اعمل تحليل السائل المنوى

اول حاجه تعملها الاتى:

.

احتياطات تحليل السائل المنوى:

1. المتناع عن الجماع من 3 الى 5 ايام يعنى ميقلش عن تلاته وميزيدش عن خمسه

ياريت الدكتور عبد الله نجيب يقولنا ليه ؟؟؟؟

2.العينه فى وعاء نظيف ومعقم

3. العينه لو هتيجى من المنزل اقصى وقت يسمح به 20 او 25 دقيقه فقط.

4. ممنوع استخدام صابون او اى وسائل اخرى للحصول على العينه.

5.العينات المختلطه بالبول ترفض تماما.

ودى اللى هتقولنا ليه فيها الدكتوره رشا بتاعت الحزلقوم

.

طاب الراجل مطبق كل الشروط وكله تمام وهيجيب العينه فى المعمل يعنى هتشتغلها هتشتغلها متتهربش.

.

خطوات تحليل السائل المنوى:

1. بمجرد الحصول على العينه توضع فى الحضان لمدة 1/2 ساعه

.

وبعدها نبدا كالتالى:

1. تقاس حجم العينه باستخدام ال pipette ونكتب الحجم.

2.نختبر اللزوجه هل فكت ولا لاء عن طريق سحب وتفريغ العينه فى ال pipette

طاب لو العينه مفكتش:

اقلب العينه كويس واسحب جزء من العينه وافرغ بالبيبته لحد ما تفك علشان اعرف احدد الحركه والعدد من هذا الجزء واسيب الجزء الباقى فى الحضانه لحد ما اشوف هيفك امتى؟؟

3.نحدد ال PH باستخدام ورقة عباد الشمس واكتب رقم يعنى 8 او 9 او الخ وعموما الطبيعى من 7-8

4. لتحديد ال Motility :

نرج العينه جيدا ثم ناخذ منها 10 ميكرون على شريحه ونغطى بكفر ثم باستخدام العدسه ال 40 نعد ف خمس فيلدات حتى نكمل العدد 200 :

ثم نحدد نسبة الاتى :

a. %age of Rapidly progressive

وده الحيوان المنوى اللى بيتحرك مستقيم من الفيلد لاخره

b. %age of Sluggish

وهى الحيوانات المنويه الكسلانه هتلاقيه كده بيمشى براحه وتاته تاته وع مهله

c. %age of Non-progressive

وهو الحيوان المنوى اللى بيتحرك بس ف مكانه بيهتز كده وخلاص

d. %age of Immotile

وهى نسبة الحيوانات اللى مش بتتحرك اصلا

5. لتحديد عدد الحيوانات المنويه :

هنخفف بس خلو بالكم معامل التخفيف يعتمد على العد التقريبى الاولى اللى انت عملته على الشريحه العاديه كالاتى :

اذا كان العدد اقل من 15 سبيرم / فيلد …. التخفيف 1:5

اذا كان العدد من15-40 سبيرم / فيلد …. التخفيف 1:10

اذا كان العدد من40-200 سبيرم / فيلد …. التخفيف 1:20

اذا كان العدد اكبر من 200سبيرم / فيلد …. التخفيف 1:50

حد يقولى يعنى ايه الكلام ده يا إمـــو ؟؟؟

انا اقولك : يعنى لو العدد قدامى تقريبا من 15-40 سبيرم لازم يكون معامل التخفيف 100 ميكرون عينه : 1000 ميكرون محلول تخفيف

طاب ايه هو بقى محلول التخفيف المستخدم يا مــــــاو ؟؟

هو Buffered 3.5 formale Saline

.

طاب كده احنا خففنا اخد بقى 10 ميكرون من محلول السيمن المخفف ده على شريحة عد ” هوموسيتوميتر ” وهعد ف مربعين كبار عكس بعض ونضرب ف معامل التخفيف كالتالى :

فى 25.000 اذا كان معامل التخفيف 1:5

فى 50.000 اذا كان معامل التخفيف 1:10

فى 100.000 اذا كان معامل التخفيف 1:20

فى 250.000 اذا كان معامل التخفيف 1:50

.

مثال يابرنس البرانيس عشان احنا كده توهنا منك ؟؟؟؟

ماشى يعنى انا جاتلى عينه فحصت لقيتهم تقريبا 20 سبيرم / الفيلد يبقى هخفف العينه بنسبة 1:10 يعنى هاخد 100 ميكرون من العينه على 1 مل من معامل التخفيف ف انبوبه وبعدين اعد على شريحة العد ف مربعين كبار وليكن مثلا العدد طلع 200 سبيرم يبقى نضرب ف معامل التخفيف يعنى 200 * 50.000 =10.000.000 سبيرم / واحد ملى

.

كده احنا جبنا العدد ف المل طاب اجيب العدد ف العينه كلها ازاى ؟؟؟

فاكرين لما قسنا الحجم الكلى للعينه ف الاول

وليكن مثلا طلع 4 مل

اذن العدد الكلى = 4*10.000.000 = 40 مليون

وده بنسميه Total count/ Egaculate

.

يتبع

تابع الحلقه 5

طاب ايه يحصل لو ملقيتش اى حيوان منوى ف العينه ؟؟؟؟

الاول ادور العينه لمدة ربع ساعه على سرعة 3000 لفه / دقيقه وافحص لو لقيت حيوان منوى او اتنين او تلاته بكتب العدد 10.000

طاب لو لقيت اكتر من تلات سبيرم بعد السنترفيوج …

ف الحاله دى يامان انت عملت حاجه غلط ف الخطوات وهات حد تانى يفحص واركن انت بقى يا برنجى.

طاب لو ملقيتش برضه بعد السنترفيوج ….

اكتب الكومنت ده :

No sperms are detected after centrifugation and examination of three successive samples are recommended.

واللى مش فاهم المعنى يقولى؟؟؟

طاب لو مفيش سبيرم بعد التدوير وكمان ال PH حمضيه اطلب تحليل ايه ككومنت ؟؟؟؟

بجد اللى هيقول دى هسميه استـــــــــــاذ وملك وبرنس وهديته عندى؟؟؟؟

5. لتحديد Sperm abnormality:

عن طريق شريحة العد برضه هعد 100 سبيرم واحدد فيهم ال:

%age of abnormal head

%age of abnormal neck

%age of abnormal tail

وهسيب انا شرح الفروق بين الانواع التلاته للدكتور الاسد البرى .. وعلى فكره قولنا اسمك بقى وانجز بلا اسد بلا نمر ؟؟؟

.

طاب لو عاوز احدد كمية الحيوانات او نسبة الحيوانات الميته الى الحيه اعمل ايه ؟؟؟

فاكرين السؤال اللى جاوبه د.عبدالله عن الفيتاليتى ” الحيويه ”

.

وهنعمل اختبار الحيويه ده ف حاله واحده بس ؟؟

اى هى الحاله دى يا د رشا ؟؟؟

.

وبتبقى كالاتى :

20ميكرون عينه + 20 ميكرون صبغة ايوزين… الرج …. ننتظر 30 ثانيه … ننظر تحت الميكروسكوب… المصبوغ = الميت

الغير مصبوغ = الحى

.

Vitality = الحى * 100 / الكلى

.

ركزو بقى ف الكومنتات لانكو اخصائيين مش فنيين :

لو كانت العينه شديدة اللزوجه يعنى لم تفك الا بعد ساعه هكتب الكومن ده :

Sper count isn’t susceptible to accurate measurement due to incomplete liquefication of semen sample

يالا بقى ياروضه اشرحيلنا يعنى ايه الكلام ده ؟؟؟

لو كان فيه صديد اكبر من 10 ف العينه :

نطلب مزرعه … اكيد عارفين تكتبوه بالانجليزى

لو كانت العينه من خارج المعمل تكتب كده :

The sample was provided to the lab.

وكمان دى بعض المصطلحات المستخدمه ف وصف التحليل :

1. .Hypospermia :

ودى معناها ان حجم العينه اقل من الطبيعى اللى هو : من 1-6 مل

2.Hyperspermia :

وطبعا مش محتاج ان اقول ان دى معناها ان حجم العينه اكبر من الطبيعى

3.Oligozoospermia :

قله حجم الحيوانات المنويه عن الطبيعى اللى هو ؟؟؟

سامع التلميذه الشاطره اللى اسمها روضة الجنه بتقول انه اقل من 20 مليون ف المل

4.cryptozoospermia :

ف الحاله دى بيكون عدد الحيوانات المنويهاقل من مليون ف المل

5.Azoospermia :

ودى معناها انه لايوجد اى حيوانات منويه بس الكومنت ده لا يكتب الا بشروط

6.Polyzoospermia :

طبعا بيكون فيه زياده كبيره ف الحيوانات المنويه عن 250 مليون ف المل

7.Asthenozoospermia :

ودى معناها ان الحركه الكليه اقل من %40

8. Teratozoospermia :

معناها ان نسبة الاشكال المشوهه اكبر من 50 ف الميه

9.Necrozoospermia :

ودى معناها قلة او عدم وجود حيوانات منويه حيه حتى بعد اختبار ال

Sperm Vitality.

تمــــــــــــــــــارين للشاطرين مين هيجاوب ياحلوين ؟؟

صح ام خطأ :

Vitality < Motility

.

لو عاوز تعرف انك كنت مركز ولا سرحت انا اثناء الشرح قولت اسئله ع الاقل لازم تفتكر اتنين منهم لو مش فاكر اقرا الموضوع تانى

ما تنسوش الكومنتات ولا احترف واخلص

مع تحياتى : الهوارى ويلد الهوارى : امين جمال امين