انا استفدت كتير من كومنتاتكم في الديكومنت اللي فات

زي مثلا:-ا لما دكتور امين قالي هي نسبه الايرور كام في البلوك؟ ودا خلاني اكلم الدكتور بتاع الشركه اللي اشتريت منه الحاجه اي نعم هو مفدنيشومفهمتش منه حاجه بس اديني بلف وادور علي النت عشان اعرف البلوكات ونسبه اخطائها . اي نعم انا لسه موصلتش لحاجه بس اكيد هوصل ان شاء الله

وكمان لما دكتور محمد خيري قالي فكي التورنكي وانتي بتسحبي وشيليه بعد ماتخلصي . جربتها النهارده مع اول بشنت جالي وبصراحه معرفتش لاني حسيت ان الابه بتترفع لفوق وهي ف الوريد فخفت اتحرك سحبت وبعدها فكيت.

كمان دكتور عبدالله قالي انه بخلي البشنت يشد اعصابه وهو بيسحب انا مع اول بشنت هيجيلي هجربها معاه ويارب تظبط معاي

بالنسبه بقي لجلافزات اللي دكتور امين قالي عليها انا جربتها من زمان ومن اول مابدءت تحاليل من 2008 وانا بحاول البس جلفزات وبرضو مبعرفش لاني مش بعرف اتحكم في حاجه وانا شغاله بيهم

كمان عجبتني اوي كلمه اهتمام من القلب بتاع دكتور امين انا فعلا هعمل كده لانها حركه حلوه جدا وفعلا هتبقي من القلب

طيب دكتور امين انا لو سيبت العينه 10 دقايق  وفصلها برضو هيبقي في جلطه ولازم تتشال او علي الاقل تنزل لتحت . دا اللي نا اتعلمته ودا اللي مش عارفه افكر في حاجه غيره بس لو حضرتك بتشتغل بطريقه تانيه ياريت تقولي عليها بالتفصييل

ازاي افصل من غير مايكون في جلطه؟

واخيرا شكرا شكرا

وعلي راي دكتور عبدالله كان معكم من امام الميكريفون

انا وبس

ههههههههههه حلو العنوان صح حسيت كده بايام سلسله حلقات خد تحليلك بتاع دكتور امين لما كنت بنزلها

المهم ومن غير تطويل طبعا احنا ف قريه والشغل فيها مش اوي بس اهو ماشيه وبنرزق يعني

وربنا يقوينا ونعرف ندفع الايجار

المريض اللي جالي النهارده بصراحه كان متعب

لانها كانت طفله

بس كانت مامتها مزعجه قالتلي بصراحه كده

انا هعمل تحليل بول ورموماتزم

هو الدكتور قالي اعمل كمان سرعه ترسيب بس انا هعملها ف الوحده الصحيه

قولتلها طبعا براحتك بس بدل مانفضل نشكشك ف البنت وتتالم خليها سحبه واحده وكمان اعملهالك من غير فلوس خالص ولا تقلقي

قالتلي شكرا ولا حوء معاها زوئي وبرضو لقيتها مصره تعمل سرعه الترسيب ف الوحده

قولتلها براحتك

سحبت من البنت وطلعت مبسوطه وجيبتلها بونبوني ولصقتلها لصقه مدوره ورسمتلها ساعه وقولتلها اقفلي ايدك جامد عشان نشوف عضلاتك

لحد ما خدعتها وغدرت بيها وسحبت منها

البنت طبعا صرخت وكده بقي وهي كانت زي القمر صالحتها وعملتها ساعه تانيه علي ايدها التانيه

وخرجت سعيده وعملتلي باباي

واشتغلت ال ASO

سنترت العينه وفصلت السيرم

وحطيت 25 مايكرون علي البلاستكه السوده

وخرجت الكيماويات بتاعته من التلاجه ولفيتها ف ايدي عشان تبقي هموجينيس

واخدت منه 25 مايكرون علي السيرم وقلبت واستنيت دقيقتين مع استمرار التقليب

وطلعت عند الشباك عشان اشوف كويس

اكيد عارفين الكوبايات اللي انا لابساها قدام عيني هههههههههههه

ملقيتش اي تجمعات

حطيت نقطه من االرياجنت علي شريحه ونقطه من الكومبلكس علي نفس الشريحه

وفحصتهم تحت الميروسكوب

لقيتهم زي بعض

يعني محصلش تفاعل

عملت الريبورت وسلمتوه ليها في معاد التسليم

بعدين بقي نبقي نشوف تحليل اليورن اللي انا عملته

كانت معكم من امام شاشه الاب توب الجديد بتاعي هأهأهأهأ

انا وبس

هو طبعا المره اللي فاتت كان تحليل

ASO AND URINE

والاه اس او طلع نيجتف بس انا قولت اقول لو طلعت بوستف كنت هعمل فيها ايه

انا حطيت 50 ميكرون من السيرم علي 50 ميكرون من الرياجنت بعد ما حركته ف ايدي شويه عشان يبقي هيموجينيس

ودورت دقيقتين علي الورقه لحد ما لقيت تكتلات

ولو مش مقتنعه انها بوستف هحطها مع نقطه من الرايجنت علي شريحه ميكرسكوبب واقارن بينهم هلاقي فرق يبقي في تفاعل

كده تبقي العينه بوستف والمطلوب نعرف هي تيتر كام

هجيب 50 مايكرون من السيرم علي 50 من صالين واعمل ميكس بالببت وانا برفع اخد 50 مايكرون من الخليط ده واركنه ف جنب يعني احطه نقطه علي طرف الورقه السوده

اجيب 50 ميكرون من الرياجنت واحطه علي الخليط بتاعي واشوف التفاعل حصل ولا

بوستف يبقي اكمل نيجتف يبقي اقف ويبقي (التتر اللى قبل دا) التتر بتاعي

طيب لو بوستف هكمل ازاي؟

باقي عندي النقطه اللي شيلاها علي جنب واللي تعتبر واحد لواحد نسبه السيرم لنسبه الصالين

احط عليها كمان 50 ميكرون من الصالين عليها

وبكده يبقي سيريل دوليوشن

” انا مش مقتنعه بالموضوع ده لانه في لعب بس كل الناس شغاله بيه حتي انا”

وبكده بقي عندي عينه مخففه مرتين اخد منها خمسين ميكرون واركنه علي جنب

والعينه اللي فاضله احت عليها ريايجنت 50 ميكرون

وادور واشوف بوستف ولا نيجاتف

انا عارفه ان الحكايه متلغبطه

بس خلينا نكمل وهبسطها ف الاخر

طبعا لو طلعت نيجتف يبقي اخد التتر اللي فات

لو بوستف يبقي هعمل الحركه الممله تاني

وهي اني احط كمان 50 ميكرون من الصالين علي العينه اللي انا راكناها اللي تخفيفها واحد الي اتنين

بكده تخفيفيها هيكون واحد الي تلاته

نفس الكلام اعمل ميكس كويس واخد 50 ميكرون واركنها ف جنب

واشتغل علي الباقي احد خمسين ميكرون تاني من الرايجنت وهكذا وهكذا

نيجتف يبقي التتر السابق بوستف يبقي سيريال ديليوشن

نيجي بقي للتبسيط

انا هاخد خمسين ميكرون سيرم علي خمسين ميكرون صالين واخد منهم خمسين ميكرون اركنه

بقي عندي عينتين واحده اشتغلها والتانيه اركنها

اللي ركنتها دي احط عليها كمان 50 صالين واخلطها واخد منها خمسين اركنها

وهكذا

التتر في ال ASO

بيكون

و200و400 و800 و1600

كانت معكم وخد بالك يادكتور عبدالله من كاااااانت دي عشان حصل لغبطه المره اللي فاتت

كانت معكم

انا وبس

وبرتقاله

CBC

تحليل سي بي سي طويل ورخم وضهري بيتعبني جدا بعده

بجانب اني بحول يعني عيني بتبقي شبه علامه اكس

لما جالي البيشنت المرادي كان خصوصي لانها كانت اختي الكبيره وطبعا وقطعا كنت قلقانه وكنت مضايقه لاني كنت حاسه اني تلميذه وفاشله كمان وطبعا دا احساسنا كلنا لما بنكون بنعمل حاجه في شغلنا ويكون حد من بيتكم هو البيشنت

بعد الرغي والحوارات المعامله كانت مختلفه عن اي بيشنت لاني ماخدتش بيناتها

ولا قعدتها ف مكان السحب اصلي جبت العينه معاي من البيت وطبعا وقطعا مدفعتش تمن التحليل

وطبعا برضو وقطعا مكنتش مبتسمالها وانا بكلمها كنت عادي جدا

المهم بقي

العينه كانت علي ايديتا وللاسف معملتش تحليل الهيموجلوبين لاسباب خاصه ( الدرابكبن خلص )  في طريقه تانيه بس انا مش عارفه قانونها الحقيقه هي انبوبه الهيماتوكريت وتملاها دم وتفصلها لمده تلت ساعه وبعدين تاخد القرايه وتحط ف القانون وتعوض بس ايه القانون ولا اعرف

وطبعا وقطعا مجبتش باقي الحاجات عشان الهيموجلوبين مش موجود يعني التحليل كان خربان جدا والديكومنت برضو هيبقي فاضي

بس قولت اكتبه بقي وخلاص

انا كل اللي عملته اني حضرت العد والديفرينشيال

بالنسبه للعد:

العد الاحمر : يعني عد كرات الدم الحمرا:-

ودا بناخد 10 مايكرون من الدم علي 2 ميلي من محلول العد الاحمر والمحلول ده بيتعان علي الرف عشان ممكن يتحفظ في درجه حراره الغرفه

نعمل ميكس ونركنه 10 دقايق علي مالتفاعل يحصل اللي هو ان المحلول بيتخلص من كل مكونات الدم ماعدا كرات الدم الحمرا عشان كده لما اشوف تحت الميكرسكوب مش هلاقي غير الكرات الحمرا بس

العد الابيض

ناخد 20 ميكرون من الدم علي 400ميكرون من المحلول ونركنه 10 دقايق

عد الصفايح

20 ميكرون دم علي 400 ميكرون من المحلول بتاعها

ابدء اشتغل بعد 10 دقايق . اجيب شريحه العد وامسح جنبها الاتنين بصابعي المبلول عشان احط كافر علي الشريحه يعني يلتصق بيها ( حد فاهم حاجه؟) المهم اغطيها بكفر مش لازم ابل صابعي هي اصلا حركه رخمه بس انا اتعودت عليها

بعد ماغطي الشريحه اخد 10 مايكرون من الانبوبه الاولي اللي هي الاحمر واحط نقطه علي الشريحه من طرف الكفر يعني قدام الكفر بحيث انها تنتشر تحته. واحطها تحت الميرسكوب وافحصها علي العدسه 40  فين بقي؟

ببص ف الميكرسكوب بلاقي خمس خانات اربعه علي الاطراف وواحده ف النص

علي الاطراف مرعات واسعه وف النص مربعات اضيق انا بقي بعد الاحمر في المربعات اللي ف النص دي .

بختار خمس مربعات واعد فيهم وباخد حرف ال L  يعني ايه ؟ يعني انا المربع هلاقيه متحدد ومفصول عن اخوه بخطين جنب بعض باخد جنبين منه بعد عليهم لو لقيت عليهم كرات بحيث ان الجنبين دول يبقوا عاملين حرف ال يعني طول وعرض بس وباقي الجوانبي لولقيت عليها كرات معدهاش ( مش قولتلكوا ملل وتحليل رخم ) المهم .

بعد ماعد اجمع الخمس مربعات واضربهم في 10000

عد الابيض علي المربعات الطرفيه بالعدسه 10بعد في الاربعه واضرب في 50

عد الصفايح (لو عندي شريحتين عد بجهزه من اول الشغل واحط الشريحه بتاع الصفيح ف طبق مبلول يعني فيه منديل مبلول عشان الصفايح تترسب ) لو معنديش غير واحده زي حلاتي كده بسيبها شويه قبل العد ف الطبق بعد ما خلص اعدها ف المربعات بتاع الاحمر بالعدشه 40 ونضرب في 1000

يااااااااااااااااااااااااااه بجد ضهري وجعني من الحانيه علي الميكرسكوب الله يجازي  الي كان السبب بس هنعمل ايه اكل عيشنا بقي

بكده خلصنا العد الحمدلله.

نيجي للدفرينشيال.

بنعمل فيلم من الدم علي الشريحه العاديه. يعني بنقف علي اول الشريحه ونفرد بكفر ونسيبه ينشف.

وبعدين نحط عليه ليشمن دي صابغه ونسيبها 3 دقايق ونخففها بمايه وننفخ فيها شويه ( يعني نقلبها ) ونسيبها 6 دقايق ونغسلها بس منشطوفهاش اوي يعني ننزل الضبغه بقي والفيلم ونرجعها بتبرق لا طبعا نغسلها يعني نحط عليها مايه ونوقع الزياده ونسيب الشريحه تنشف خالص

وافحصها تحت الميكرسكوب علي العدسه ميه بس ثواني قبل الفحص ….. احنا الفيلم هنلاقيه متقسم احنا بنختار الديل يعني اخر مكان من الفيلم عشان الكرات متبقاش فوق بعض وتبقي واضحه. افحص ازاي بقي ( سؤال رخم اوي ومتعب ) بحط نقطه زيت سيدار ( اولين ياسلطان زيت اولين من عم امين يلزم خدمه ياسلطان ……… سمارا ) الزيت ده هو زت عشان العدسه ال100 اللي احنا هنعد فيها اسمها العدسه الزيتيه يعني لازم تكون مغموسه في الزيت ده عشان تشوف من خلالها . بحط نقطه وانزل بالعدسه 100 علي الشريحه وابص واظبط الميكرسكوب عشان ابدء اعد كرات الدم البيضه وانواعها بفتح الفريم وارفع المكثف واعلي الاضاءه ( مهو فيلم بقي) وابدء اعد انواع الكرات . وربنا معانا يارب

وشكرا وشكرا

كانت معكم وضهرها تعباااااان جدا

انا وبس

اه صحيح باقي المكونات مش هعملها غير لما اجيب درابكن ياما اعرف القانون.

واختي زعقتلي وقالتلي انتي فاشله وكده يعني. علي ماجيب بقي ببعت لاب تو لاب العينه .